ભારતનું સૂર્યના સંશોધનાત્મક અભ્યાસ માટેનું પહેલું અવકાશયાન આદિત્ય-એલ 1 અવકાશયાન તેના લાગ્રાન્ગ પોઇન્ટ-1 (એલ-1) પર પહોંચવાના અંતિમ તબક્કામાં છે. લાગ્રાન્ગ પોઇન્ટ પૃથ્વીથી 15 લાખ કિલોમીટરના અતિ દૂરના અંતરે છે. ઇન્ડિયન સ્પેસ રિસર્ચ ઓર્ગેનાઇઝેશન (ISRO)નાં  ચેરમેન એસ.સોમનાથે હજી થોડા દિવસ પહેલાં જ એવી માહિતી આપી હતી કે, આદિત્ય-એલ 1 અવકાશયાન 2024ની 6 જાન્યુઆરીએ લાગ્રાન્ગ પોઇન્ટ-1 પર પહોંચશે. જોકે આદિત્ય-એલ 1 અવકાશયાન હવે આ તબ્બકે લાગ્રાન્ગ પોઇન્ટ 1ની  હેલો ઓર્બિટ (લાગ્રાન્ગ પોઇન્ટ ફરતેનું ક્ષેત્ર)માં પ્રવેશવા માટે તૈયારીમાં છે.

લાગ્રાન્ગ પોઇન્ટ-1 અંતરિક્ષનો એવો હિસ્સો છે જ્યાં સૂર્ય અને પૃથ્વીનું ગુરુત્વાકર્ષણ બળ એક સમાન થઇ જાય છે. લાગ્રાન્ગ પોઇન્ટ-1ના સમગ્ર અંતરિક્ષ વિસ્તારમાં શૂન્યાવકાશ છે. કોઇપણ અવકાશયાન માટે લાગ્રાન્ગ પોઇન્ટ-1ના વિસ્તારમાં સલામત રીતે પહેાંચવાની પ્રકિયા ખરેખર બહુ પડકારરૂપ ગણાય છે. આ અંતિમ તબક્કે અવકાશયાનની ચોક્કસ દિશા અને  તેની ગતિ બંને પરિબળો પર સંપૂર્ણ નિયંત્રણ હોવું જરૂરી છે. આદિત્ય-એલ 1 અવકાશયાન તેના લાગ્રાન્ગ પોઇન્ટ-1 પર પહોંચીને તેની ફરતે ગોળ ગોળ પ્રદક્ષિણા કરવાનું શરૂ કરે એ સમગ્ર ગતિવિધિ બહુ મહત્વની  છે. આ જ લાગ્રાન્ગ પોઇન્ટ 1 પર આદિત્ય-એલ 1 અવકાશયાન સૂર્યની બરાબર સામે રહી શકશે. સાથોસાથ સૂર્યમાં થતી અજીબોગરીબ અને અકળ ગતિવિધિનો સંશોધનાત્મક અભ્યાસ કરી શકશે.

એસ.સોમનાથે એવી મહત્વની સ્પષ્ટતા પણ કરી છે કે આદિત્ય-એલ 1 અવકાશયાન લાગ્રાન્ગ પોઇન્ટ-1 પર પહોંચે ત્યારે અમે એક એન્જિન ફાયર કરીશું કે, જેથી અવકાશયાન લાગ્રાન્ગ પોઇન્ટ-1ના વિસ્તારથી વધુ આગળ ન જાય. અવકાશયાન અ લાગ્રાન્ગ પોઇન્ટ-1 પોઇન્ટ પર  સલામત રીતે પહોંચીને પછી તેની ફરતે ગોળ ગોળ પ્રદક્ષિણા શરૂ કરશે. સાથોસાથ તેનાં વૈજ્ઞાનિક ઉપકરણો સૂર્યની બહારની કિનારી કોરોના સહિત અન્ય પાસાંનો સંશોધનાત્મક અભ્યાસ પણ શરૂ કરશે. આ બધી માહિતી ઇસરોના મુખ્ય મથકે મળશે. આદિત્ય એલ-1 અવકાશયાનની મદદથી સૂર્યમાં થતી અકળ ગતિવિધિને કારણે પૃથ્વી પરના ઋતુચક્રને કેવી અને કેટલી અસર થાય છે તેની પણ બહુ ઉપયોગી માહિતી મળી શકશે.