આગામી સામાન્ય ચૂંટણીઓમાં વધુને વધુ મતદારોને મતદાન કરવા પ્રોત્સાહિત કરવા ગુજરાતના મુખ્ય ચૂંટણી અધિકારીની કચેરી દ્વારા જાગૃતિ અભિયાન અને વિશેષ અભિયાન ચલાવવામાં આવી રહ્યું છે. ભારતના ચૂંટણી પંચે યુવા મતદારોને આકર્ષવા પર વિશેષ ભાર મૂક્યો છે.

 જે અંતર્ગત મતદાર યાદીમાં યુવા મતદારોની નોંધણી માટેના નિયમોમાં સુધારો કરવામાં આવ્યો છે. પરિણામે આ વર્ષે ગુજરાત વિધાનસભાની ચૂંટણીમાં કુલ 11,74,370 યુવાનો પ્રથમ વખત મતદાનના અધિકારનો ઉપયોગ કરશે.

મુખ્ય ચૂંટણી અધિકારી પી.ભારતીએ જણાવ્યું હતું કે ભારતના ચૂંટણી પંચના નવતર અભિગમને કારણે યુવા મતદારોમાં મતદાન પ્રત્યે ઉત્સાહ વધ્યો છે. આ સુધારણા કાર્યક્રમ પછી, 10 ઓક્ટોબર, 2022 ની સ્થિતિએ 1-1-2022 થી 1-10-2022 સુધીમાં 18 વર્ષની વય પૂર્ણ કરનાર 3,24,420 યુવાનોનો મતદાર યાદીમાં સમાવેશ કરવામાં આવ્યો છે.

 તેમણે કહ્યું કે ગુજરાતમાં 89 બેઠકો માટેની ચૂંટણીના પ્રથમ તબક્કામાં કુલ 5,87,175 પ્રથમ વખત મતદારો તેમના મતાધિકારનો ઉપયોગ કરશે. સુરત જિલ્લામાં સૌથી વધુ 1,02,506, ભાવનગર 45,277, રાજકોટ 42,973, કચ્છ 42,294 અને સુરેન્દ્રનગર જિલ્લામાં 39,437 યુવા મતદારો છે. જ્યારે સૌથી ઓછી સંખ્યામાં યુવા મતદારો ધરાવતા જિલ્લાઓમાં ડાંગમાં 8,680, પોરબંદરમાં 13,561, તાપીમાં 13,800, નર્મદામાં 15,796 અને બોટાદમાં 15,612 છે.