નવા વર્ષની દરેક લોકો ઉત્સાહભેર ઉજવણી કરતા હોય છે ત્યારે ગીર જંગલના પશુઓને પણ આ ઉજવણીમાં સામેલ કરવાની જૂની પરંપરા ચાલી આવે છે જેમાં માલધારીઓ દ્વારા ભેંસોને પોતાના પર રહેલું જંગલી હિંસક પ્રાણીઓનું કે અન્ય બીમારીનું તમામ ભારણ ઉતરી જાય તેવી માન્યતા સાથે બાણ નાખવાની આદિ અનાદિકાળથી પ્રથા ચાલી આવે છે.

મૂળ ગીરના લોકસાહિત્યકાર રાજભા ગઢવી ના પિતા અને અનેક વર્ષો સુધી ગીરમાં પોતાનું જીવન વ્યતિત કરનાર આલસુરભાઈ ગઢવી એ જણાવ્યું હતું કે ગિરના માલધારીઓ માને છે કે ભેંસોને વર્ષમાં એક વાર બાણ નાખવાથી તેઓની શક્તિ બમણી થઈ જાય છે તેમજ હકીકતે સિંહોના હુમલાનો ભોગ ન બને અને પોતે જંગલી પ્રાણીઓથી સ્વરક્ષણ માટે ખૂંખાર બની શકે તે માટેની આ પરંપરા ચાલી આવે છે ગીરના માલધારીઓની સામાન્ય લોકો કરતા રીત રિવાજ અને રહેણી કરણી અનોખી છે ગીરમાં અનોખી રીતે જીવન જીવતા માલધારીઓમાં પોતાની ભેંસોને પોતાની ઝોકમાંથી બહાર કાઢે તે પહેલા બાણ નખાવવા માટેની તમામ તૈયારીઓ કરી લેવામાં આવે છે.