નવસારી શહેરમાં માતા-પિતા માટે લાલબત્તી સમાન કિસ્સો પ્રકાશમાં આવ્યો છે. શહેરના જમાલપોરના નીલકંઠ અપાર્ટમેન્ટમાં નેપાળી પરિવારની એક વર્ષીય બાળા રમતા રમતા પાણી ભરેલી ડોલમાં પડી ગઈ હતી.વોચમેન પિતા સૂતા હતા અને માતા ઘરકામ કરવા ગઈ હતી. આ દરમિયાન નાની બાળા રમતા રમતા પાણી ભરેલી ડોલમાં પડતા તેનું ડૂબી જવાથી મોત નિપજ્યું હતું.

અચાનક જાગી ગયેલા પિતાએ દીકરીને ડોલમાં જોતા તેમના હોશ ઉડી ગયા હતા. તુરંત દીકરીને ડોલમાંથી બહાર કાઢી સારવાર માટે હોસ્પિટલે ખસેડવામાં આવી હતી. ખાનગી હોસ્પિટલમાં બાળાને લાવતા તબીબોએ તપાસીને તેને મૃત જાહેર કરી હતી. સમગ્ર ઘટનાને લઈને પોલીસ ઘટના સ્થળે પહોંચી હતી. પોતાના સંતાનને ગુમાવતા પરિવારમાં શોકનો માહોલ છવાયો છે.