ચીખલી તાલુકામાંથી પસાર થતા નેશનલ હાઈવે નંબર ૪૮ પર આવેલા ચીખલી ઓવરબ્રિજ પાસેથી નવસારી એલસીબી પોલીસે ૪૬,૦૦૦/- રૂપિયાનો વિદેશી દારૂ, કાર, મોબાઈલ મળી કુલ ૩.૭૧ લાખ રૂપિયાના મુદ્દામાલ સાથે એકની ધરપકડ કરી હતી. જ્યારે અન્ય એક મહિલા સહિત ત્રણને પોલીસે વોન્ટેડ જાહેર કર્યા છે. મળતી માહિતી મુજબ, નવસારી એલસીબી પોલીસનો સ્ટાફ પેટ્રોલિંગમાં હતો ત્યારે ખાનગી રાહે મળેલી બાતમીના આધારે ચીખલી તાલુકામાંથી પસાર થતા નેશનલ હાઈવે નંબર ૪૮ ઉપર મુંબઈથી અમદાવાદ જતા ટ્રેક ઉપર ચીખલી ઓવરબ્રિજ ઉતરતા વોચ ગોઠવી હતી.

આ દરમિયાન બાતમી મુજબની હ્યુન્ડાઈ કાર આવતા તેને અટકાવી કારમાં તપાસ કરતા કારમાંથી વગર પાસ પરમિટ વિનાની ટીન બિયરની નાનીમોટી કુલ ૩૧૧ બોટલ કિંમત ૪૬,૫૦૦ અને કારની કિંમત ૩ લાખ રૂપિયા તેમજ ત્રણ મોબાઈલની કિંમત ૨૫,૦૦૦ મળી કુલ ૩,૭૧,૫૦૦ રૂપિયાનો મુદ્દામાલ કબજે કરવા સાથે કાર ચાલક બોનીકુમાર રશ્મીકાંત રોહિત (રહે.બોરીયાચ, તા. જિ.નવસારી)ની ધરપકડ કરી હતી. જ્યારે દારૂનો જથ્થો ભરાવનાર અને મંગાવનાર જયેશ હળપતિ (રહે.પારડી, તા.જિ.વલસાડ) તેમજ મનોજ ઉર્ફે સૂરજ રાજપત ભારતી, ફુલ્વાબેન ઉર્ફે ફુલા રાજપત ભારતી (બંને રહે.પાંડેસરા, સુરત) એમ ત્રણને પોલીસે વોન્ટેડ જાહેર કર્યા હોવાનું જાણવા મળ્યું હતું.