પાકિસ્તાન તરફથી ભારતમાં ઘૂસી આવતું એક ડ્રોન-વિમાન BSFની મહિલા ટુકડીએ તોડી પાડયું હતું. આ અંગે સત્તાવાર સાધનો જણાવે છે કે, અમૃતસરથી 40 કિ.મી. ઉત્તરે આવેલા યહાર-પુર ગામ પાસે આ વિમાન 11.05 કલાકે ભારતની સરહદમાં ઘૂસી આવતા સરહદી સલામતી-હવેલી મહિલા ટુકડીએ તેની ઉપર ગોળીબાર કરતા તે તૂટી પડયું હતું. તેમાંથી 3.1 કિ.ગ્રા. જેટલો નાર્કોટિક્સનો જથ્થો પણ હાથ કરવામાં આવ્યો હતો. આ પછી BSFનાં જવાનોએ તે 'કોપ્ટર'ની પુરી તપાસ પણ કરી લીધી હતી. તેમ કહેતા BSFનાં પ્રવક્તાએ વધુમાં જણાવ્યું હતું કે, ડ્રોન દ્વારા નશાકારક પદાર્થો ભારતમાં ઘૂસાડી ભારતના યુવા-ધનને 'ખતમ' કરવાના હેતુથી જ પાકિસ્તાનમાંથી આવા વિમાનો વારંવાર મોકલવામાં આવે છે.

પરંતુ દરેક વખતે અમે તેના તે દુષ્ટ-પ્રયત્નો નિષ્ફળ બનાવીએ છીએ. આ વખતે અમારી મહિલા ટુકડીએ આવું એક વિમાન તોડી પાડયું હતું અને ભારતમાં નશાકારક પદાર્થો ઘૂસાડી, યુવાનોને તે કુછંદે ચઢાવી દેશના યૌવન-ધનને બરબાદ કરવાની પાકિસ્તાન તરફથી થઈ રહેલા લગભગ તમામ પ્રયાસો અમે નિષ્ફળ બનાવીએ છીએ અનેક વખત ભૂમિ-ઉપર પણ સરહદ ઓળંગી ભારતમાં નાર્કોટિક્સ ઘૂસાડવાના પ્રયાસો પણ અમે નિષ્ફળ બનાવ્યા છે. તેમ પણ BSFનાં પ્રવક્તાએ અમૃતસરમાં પત્રકારોને ઉક્ત ઘટના પછી યોજાયેલી પ્રેસ કોન્ફરન્સમાં જણાવ્યું હતું.