મહારાષ્ટ્ર અને ગુજરાતને જોડતા મહત્ત્વનાં સ્ટેટ હાઇવે નંબર-6નો ધાનોરા ગામનો નદી પરનો પુલ ગતરોજ સવારે અચાનક તૂટી પડતા બંને રાજ્યોના સીમાવર્તી ગામો વચ્ચેનો વાહનવ્યવહાર ખોરવાયો હતો. જોકે સદ્ભાગ્યે આ ઘટનામાં કોઈપણ પ્રકારની જાનહાની થઈ નહોતી. મળતી માહિતી મુજબ, નંદુરબાર જિલ્લાનાં ધાનોરા ગામ પાસે રંકા નદીનાં પુલ ઉપરથી સવારે 9  વાગ્યે એક ST બસ અને તેની પાછળ એક ટ્રક પસાર થયા પછી ગણતરીની મિનિટમાં જ આખો પુલ તૂટીને નદીમાં પડયો હતો. જોકે ST બસ અને ટ્રક પસાર થયા પછી દુર્ઘટનાં થતા મોટી દુર્ઘટના બનતા રહી ગઈ હતી.

રાજ્યનાં ધોરી માર્ગ નંબર-6 પર સાર્વજનિક બાંધકામ વિભાગે લગભગ 40 વર્ષ પહેલાં આ બ્રિજ બાંધ્યો હતો. મહારાષ્ટ્ર અને ગુજરાત વચ્ચે વાહન વ્યવહાર માટે મહત્ત્વના ગણાતા આ સ્ટેટ હાઇવે પરનો બ્રિજ જે રીતે તૂટી પડયો એ જોતા પ્રશ્ન ઉઠાવવામાં આવ્યો છે કે તૂટી પડે એટલી હદે જોખમી બની ગયા છતાં તેનું સ્ટ્રક્ચરલ ઓડિટ થયું હતું કે નહીં, દુર્ઘટના બાદ સરકારી અધિકારીઓ ઘટના સ્થળે દોડી આવ્યા હતા.