મુંબઈ:જયપુર જઈ રહેલી એક કરોડથી વધુની કિંમતની સિગારેટ ભરેલી ટ્રકને લૂંટારુ ટોળકીએ મનોર પાસેથી હાઈજેક કરી હોવાની ઘટના પ્રકાશમાં આવી હતી.મનોર પોલીસે જણાવ્યું હતું,શુક્રવારે ઘટના બની હતી.મુંબઈથી જયપુર તરફ જઈ રહેલી ટ્રકનું મુંબઈ-અમદાવાદ હાઈવે પર વાઘોબા ખિંડ નજીક અપહરણ કરવામાં આવ્યું હતું.બાદમાં ટ્રક મધ્ય પ્રદેશના બુરહાનપુર જિલ્લા માંથી બિનવારસી હાલતમાં મળી આવી હતી.મનોર પોલીસ સ્ટેશનનો સ્ટાફ બુરહાનપુરના લાલબાગ પોલીસ મથકે રવાના થઇ ગઈ હોવાનું જણાવ્યું હતું,ટ્રકમાંની સિગારેટ જેમની તેમ હોવાનું પોલીસનું કહેવું છે.મનોર પોલીસ સ્ટેશનનાં આસિસ્ટન્ટ ઈન્સ્પેક્ટરે જણાવ્યું હતું કે,એક કરોડથી વધુની કિંમતની સિગારેટ ભરેલી ટ્રક જયપુર જઈ રહી હતી ત્યારે માર્ગમાં મુંબઈ-અમદાવાદ હાઈવે પર સાત જેટલા લૂંટારુની ટોળકીએ તેને રોકી હતી.છરીની ધાકે ડ્રાઈવરને ધમકાવી ટ્રક માંથી નીચે ઉતારવામાં આવ્યો હતો.ત્યાર બાદ રસ્તા પરથી ખેંચીને તેને જંગલ વિસ્તારમાં લઈ જવાયો હતો.ત્યાં મારપીટ કરી તેને બાંધી દઈ લૂંટારા ટ્રક સાથે ફરાર થઈ ગયા હતા.આ પ્રકરણે ડ્રાઈવર ચંચલ સિંહે મનોર પોલીસ સ્ટેશનમાં ફરિયાદ નોંધવતા પોલીસે તપાસ હાથ ધરી હતી.