ઔરંગાબાદ જિલ્લાનાં કન્નડ તાલુકામાં હિવરખેડા-નાંદગીર વાડીમાં વિદ્યુત વાયરોનાં ડીપીમાં જોડાણ દરમિયાન વીજળીનો જોરદાર આંચકો લાગતા નાવડી વિસ્તારનાં ચાર મજૂરનાં મોત થયા હતા, જ્યારે એક જણ ગંભીર ઈજા પામ્યો હતો. નવા ઇલેક્ટ્રિફિકેશનનું કામ મહાવિતરણ તરફથી એક ખાનગી કોન્ટ્રાક્ટરને આપવામાં આવ્યું હતું અને આ લોકો તેના માટે કામ કરી રહ્યા હોવાનું જાણવા મળ્યું હતું.

જોકે આ ઘટના આજે બપોરે અઢી વાગ્યે બની હતી. આ સંદર્ભે વધુ વિગતાનુસાર હિવરખેડ-નાંદગીર વિસ્તારમાં નવો વિદ્યુત પ્રવાહ પૂરો પાડવા માટે જરૂરી ડીપી-પોલ પર વિજતાર ખેંચવાનું કામ ચાલી રહ્યું હતું. મહાવિતરણ આ કામ ખાનગી કોન્ટ્રાક્ટરને આપ્યું હોવાથી નાવડી વિસ્તારના ચાર લોકો ગણેશ થૈટ (ઉ.વ.35), ભસી વમકડ (ઉ.વ.35), જગદીશ મુચુંડે અને અર્જુન મગર (ઉ.વ.26) પોલ પર વિજતાર ખેંચવા સહિતનાં કામમાં વ્યસ્ત હતા.

તે સમયે અચાનક વિજ-પ્રવાહ શરૂ થતા આ ચારેયને જોરદાર ઇલેક્ટ્રિક શોક લાગ્યો તો જેમાં આ ચારેયના ઘટના સ્થળે જ મોત થયા હતા. એવું કહેવાય છે કે, આ વિસ્તારમાં એક વ્યક્તિએ ખેંચેલા જીવંત વાયરના સંપર્કમાં અન્ય કેબલ આવી જવાથી આ લોકોને જોરદાર આંચકો લાગ્યો હતો.

આ ઘટના બાદ મૃતકનાં સંબંધીઓ, મહાવિતરણના ઉચ્ચાધિકારીઓ, પોલીસ અને સ્થાનિક પ્રશાસનના કર્મચારીઓ ઘટના સ્થળે દોડી ગયા હતા. ત્યારબાદ મજૂરનાં મૃતદેહોને પોસ્ટમોર્ટમ માટે મોકલી આપી ખરેખર કયા કારણસર આ દુર્ઘટના થઈ હતી તેની તપાસ આદરી હતી.