રાંદેર રોડ તાડવાડી સ્થિત શિવ ઓમ સોસાયટીમાં આવેલા ખેમાણી માર્કેટીંગના ગોડાઉનમાં ત્રાટકેલા તસ્કરો અલગ-અલગ બ્રાન્ડની સિગારેટ, રોકડ અને સીસીટીવી કેમેરાનું ડીવીઆર સહિત કુલ રૂ. ૨.૪૧ લાખની મત્તા ચોરીને ફરાર થઇ ગયા હતા.

સિટીલાઇટ રોડ સ્થિત અણુવ્રત દ્વાર નજીક સુર્યા પેલેસ કોમ્પ્લેક્ષમાં રહેતા અમીત વિજય ખેમાણી આઇ.ટી.સી લિમીટેડની ટોબેકો, લોટ અને બિસ્કીટની એજન્સી ધરાવે છે અને તેમનું ગોડાઉન રાંદેર રોડ તાડવાડી સ્થિત મેરૂલક્ષ્મી મંદિરની પાછળ શિવ ઓમ સોસાયટીમાં આવેલું છે. ગત રાત્રે તસ્કરોએ ખેમાણી માર્કેટીંગના ગોડાઉનને નિશાન બનાવ્યું હતું. તસ્કરો ગોડાઉનના ઉપરના ભાગે ગેલ્વેનાઇઝના પતરાને લોખંડની નરાજ વડે તોડી અંદર પ્રવેશી અલગ-અલગ બ્રાન્ડની સિગારેટના રેક્ઝીનના ૬ થેલા જેમાં કુલ રૂ. ૧.૯૦ લાખની કિંમતની સિગારેટ હતી તે ઉપરાંત ગોડાઉનના કબાટનું લોક તોડી તેમાંથી રોકડા રૂ. ૫૦,૦૦૦ અને સીસીટીવી કેમેરાનું ડીવીઆર મળી કુલ રૂ. ૨.૪૧ લાખની મત્તા ચોરીને ફરાર થઇ ગયા હતા. સવારે ગોડાઉનના મેનેજરને જાણ થતા તેમણે અમીત ખેમાણીને જાણ કરી હતી. ઘટના અંગે રાંદેર પોલીસે ચોરીનો ગુનો નોંધી તસ્કરોનું પગેરૂ મેળવવાની કવાયત હાથ ધરી છે.