ભારતીય રેલ્વે મુસાફરોની સુવિધાઓને ધ્યાનમાં રાખીને તિરુપતિ રેલ્વે સ્ટેશનને વિશ્વ કક્ષાનું વિકસાવી રહી છે. સ્ટેશન સંપૂર્ણ રીતે વિકસિત થયા બાદ મુસાફરોને ઘણી નવી સુવિધાઓ મળશે. રેલ્વે મંત્રાલય દેશમાં 40થી વધુ સ્ટેશનો વિકસાવી રહ્યું છે. આમાંના ઘણા સ્ટેશનો પર કામ શરૂ થઈ ગયું છે. જ્યારે ઘણામાં ટેન્ડર પ્રક્રિયા શરૂ થઈ ગઈ છે. રેલવે મંત્રાલય દ્વારા જ તમામ સ્ટેશનોનો વિકાસ કરવામાં આવી રહ્યો છે. રેલ્વે મંત્રાલયનાં જણાવ્યા અનુસાર, તિરુપતિ રેલ્વે સ્ટેશનને વિકસાવવા માટે અંદાજિત 300 કરોડ રૂપિયાનો ખર્ચ કરવામાં આવશે. ફાઉન્ડેશનમાં કોંક્રીટનું 80 ટકા કામ પૂર્ણ થઈ ગયું છે. મંત્રાલયનાં જણાવ્યા અનુસાર, સર્વે અને ભૂસ્તરશાસ્ત્રીય તપાસ પણ પૂર્ણ થઈ ગઈ છે.

આ ઉપરાંત સ્ટેશનની દક્ષિણ બાજુથી લાઈનો ખસેડવાનું અને ભોંયરામાં ખોદવાનું કામ પૂર્ણ થઈ ગયું છે. ભોંયરામાં પાર્કિંગ અને અન્ય સુવિધાઓ વિકસાવવામાં આવશે. રેલવે મંત્રાલય સમયસર સ્ટેશનનો વિકાસ પૂર્ણ કરશે. જેથી અહીં આવતા શ્રદ્ધાળુઓને વધુ સારી સુવિધા મળી શકે. દેશના તમામ સ્ટેશનો વિકાસશીલ વિસ્તારોમાં બનાવવામાં આવ્યા છે. હવે વિસ્તારો સંપૂર્ણ રીતે વિકસિત થઈ ગયા છે. તેથી સ્ટેશનો પર મુસાફરોની સંખ્યામાં નોંધપાત્ર વધારો થયો છે. આમાંના ઘણા સ્ટેશનોમાં પ્રવેશ એક તરફ છે. બસ સ્ટેન્ડ અથવા પરિવહનના અન્ય સાધનો ઘણાથી દૂર છે. જેના કારણે મુસાફરોને ટ્રેન પકડવામાં મુશ્કેલી પડી રહી છે. 

રેલ્વે મુસાફરોને સુવિધા આપવા માટે ગીચ સ્ટેશનો વિકસાવી રહી છે. અયોધ્યા, બિજવાસન, સફદરજંગ, ગોમતીનગર, તિરુપતિ, ગયા, ઉધના, સોમનાથ, એર્નાકુલમ, પુરી, ન્યુ જલપાઈગુડી, મુઝફ્ફરપુર, લખનૌ (ચારબાગ), ડાકનિયા તલાવ, કોટા, જમ્મુ તવી, જલંધર કેન્ટ, નેલ્લોર, સાબરમતી, જયપુર, ફરિદબાદ, ભુવન, કોલ્લમ, ઉદયપુર સિટી, જેસલમેર, રાંચી, વિશાખાપટ્ટનમ, પુડુચેરી, કટપડી, રામેશ્વરમ, મદુરાઈ, સુરત, જોધપુર, ચેન્નાઈ એગમોર, ન્યુ ભુજ આ તમામ મુખ્ય સ્ટેશનો વિકસાવવાના છે. 

સ્ટેશનોનો વિકાસની વાત કરીએ તો, સ્ટેશનની બંને બાજુથી એન્ટ્રી હશે. એટલે કે, સ્ટેશન શહેરના બંને ભાગોને જોડશે. ફૂડ કોર્ટ, વેઇટિંગ લોન્જ, બાળકો માટે રમવાની જગ્યા ઉપરાંત શહેરની સ્થાનિક પ્રોડક્ટને પ્રોત્સાહન આપવા માટે સ્થળ નક્કી કરવામાં આવશે. શહેરની મધ્યમાં આવેલા આ સ્ટેશનોમાં નાગરિકો માટે સિટી સેન્ટર જેવી જગ્યા બનાવવામાં આવશે. માસ્ટર પ્લાનમાં ટ્રાફિકની વ્યવસ્થા કરવામાં આવી છે. પરિવહનના તમામ મોડ સ્ટેશન સાથે જોડાયેલા હશે. ઓટો, ટેક્સી અને બસ સ્ટેન્ડ એકબીજા સાથે જોડાયેલા હશે. સમગ્ર બિલ્ડીંગ ગ્રીન બિલ્ડીંગ ટેક્નોલોજીથી બનાવવામાં આવશે. દિવ્યાંગોની સુવિધા માટે ખાસ ધ્યાન રાખવામાં આવશે.