સુરત જિલ્લાનાં કામરેજનાં માછી ગામમાં ભૂંડને પકડવા માટે ખેતરમાં મૂકવામાં આવેલા ફંદામાં દીપડો ફસાઈ ગયો હતો. જેને ગળાના ભાગે ગંભીર ઈજાઓ પહોંચતા ઘટના સ્થળે જ મોત થયું હતું. મળતી માહિતી મુજબ, દક્ષિણ ગુજરાત સહિત સુરત જિલ્લાના જંગલ વિસ્તારમાં મોટી સંખ્યામાં દીપડા વસવાટ કરે છે અને અવારનવાર શિકારની શોધમાં માનવ વસ્તી તરફ ધસી આવે છે.

જોકે કામરેજનાં માછી ગામે શિકારની શોધમાં ફરતો દીપડો શેરડીનાં ખેતરમાં આવ્યો ત્યારે ભૂંડને પકડવા માટે ખેતરમાં લગાવવામાં આવેલા ફંદામાં ફસાઈ ગયો હતો. આ ફંદામાં ફસાયેલા દીપડાના ગળાના ભાગે ગંભીર ઈજાઓ પહોંચતા તેનું ઘટના સ્થળે જ મોત થયું હતું. દીપડાનો મૃતદેહ જોઈ બનાવની જાણ સ્થાનિક રહીશોએ કામરેજ વન વિભાગને કરી હતી. વન વિભાગની ટીમ બનાવના સ્થળે પહોંચી જઈ દીપડાના મૃતદેહનો કબજો લઈ જેનું પેનલ પીએમ કરાવી વિધિવત રીતે અગ્નિસંસ્કાર કર્યા હતા.(ફાઈલ ફોટો)