તાપીમિત્ર ન્યુઝ,આહવાઃડાંગ જિલ્લાની ભાતિગળ લોકસંસ્કૃતિને ઉજાગર કરતા ડાંગ દરબારના ભવ્ય લોકમેળાનો તા.૫મી માર્ચ,૨૦૨૦નાં રોજ સવારે ૧૧ વાગ્યે,રાજ્યના રાજ્યપાલ શ્રી આચાર્ય દેવવ્રતના હસ્તે કરાશે.તે પૂર્વે સવારે ૯:૩૦ વાગ્યે ડાંગના રાજવીઓની ભવ્ય શોભાયાત્રા કલેક્ટર કચેરી ખાતેથી નીકળી,આહવાના મુખ્ય માર્ગો ઉપર ફરીને,રંગ ઉપવન ખાતે પધારશે. રંગારંગ સાંસ્કૃતિક કાર્યક્રમોના સથવારે નિકળનારી આ શોભાયાત્રામાં શણગારેલી બગીઓમાં સવાર થઇને,ડાંગના માજી રાજવીઓ તેમના પ્રજાજનોનું અભિવાદન ઝીલશે. રંગ ઉપવન ખાતે આયોજિત ડાંગ દરબારના ઉદ્‍ધાટન સમારોહ દરમિયાન રાજ્યપાલ શ્રી આચાર્ય દેવવ્રતના હસ્તે આ રાજવીઓને બા અદબ પોલિટિકલ પેન્શન એનાયત કરવા સાથે,તેમનુ પાન-સોપારી અર્પણ કરી શાલ ઓઢાડી પારંપારિક સ્વાગત પણ કરાશે. તા.૦૫ થી ૦૮ માર્ચ, ૨૦૨૦નાં દિવસો દરમિયાન આહવાના આંગણે યોજાઇ રહેલા આ ડાંગ દરબાર દરમિયાન દરરોજ સાંજે ૭:૩૦ વાગ્યે રંગ ઉપવન ખાતે સ્થાનિક પારંપારિક ડાંગી નૃત્યો સહિત વિવિધ કલાકારો દ્વારા રંગારંગ સાંસ્કૃતિક કાર્યક્રમો પણ રજુ કરાશે. જેનો મેળો મ્હાલવા આવતા પ્રજાજનોને લાભ મળશે.