તાપીમિત્ર ન્યુઝ,સુરત:અમરોલીના સાયણ રોડ પર આવેલ બીઆરટીએસ બસ ડેપો પાસે ઉભેલી પત્ની પર પતિએ જ્વલનશીલ પદાર્થ વડે એટેક કરતાં ચકચાર મચી જવા પામી છે. જોકે એસીડ એટેકમાં ઘવાયેલી મહિલાને સારવાર અર્થે નજીકના ખાનગી હોસ્પિટલમાં ખસેડાઇ છે.અમરોલીના સાયણ રોડ પર આવેલ સન્ડે રેસીડેન્સીમાં ભુમિબેન પરમાર પરિવાર સાથે રહે છે અને ધાગા કટીંગનું કામ કરી પરિવારનું ગુજરાન ચલાવે છે. ૧૧મી નવેમ્બરની સાંજના સુમારે ભુમિબેન અમરોલીના સાયણ રોડ પર આવેલ બીઆરટીએસ એસટી ડેપોની બાજુમાં આવેલ ચા ની લારી પાસે ઉભા હતા. તે દરમ્યાન તેનો પતિ જીગ્નેશ પરમાર દોડતો દોડતો તેની પાસે આવી તેણીને ધક્કો મારી નીચે પાડી દીધી હતી. ત્યારબાદ તેના હાથમાં રહેલ કોઇ ­વાહીની બોટલ તેના મોંઢા અને જમણાં હાથ પર ફેંકી દઇ નાસી છુટ્યો હતો. પતિ ધ્વારા કરાયેલા જ્વલનશીલ ­વાહીના કારણે ગંભીર રીતે દાઝેલી ભુમિબેનને સારવાર અર્થે નજીકની ખાનગી હોસ્પિટલમાં ખસેડાઇ છે. બનાવ અંગેની જાણ થતાં જ અમરોલી પી.આઇ. સહિતનો કાફલો ઘટના સ્થળે દોડી આવ્યો હતો. અને સ્થળ નિરીક્ષણ કર્યા બાદ ભુમિબેનની ફરીયાદના આધારે તેના પતિ વિરૂધ્ધ ગુનો નોંધી વધુ તપાસ હાથ ધરી છે.