કડોદરાનાં નેશનલ હાઇવે પરથી વિદેશી દારૂ ભરી કોસંબા તરફ જતા એક ટેમ્પોને ઝડપી પાડયો હતો. પરંતુ પોલીસને જોઇ ટેમ્પો ચાલક ભાગી છૂટ્યો હતો. ત્યારે કડોદરા પોલીસે ટેમ્પોમાંથી રૂપિયા 11 લાખથી વધુનો દારૂ ઝડપી પાડી ટેમ્પો ચાલકને વોન્ટેડ જાહેર કરી આગળની કાર્યવાહી હાથ ધરી હતી.

સુત્રો પાસેથી મળતી માહિતી મુજબ, પલસાણા તાલુકાના કડોદરા જીઆઇડીસી પોલીસની ટીમ પેટ્રોલિંગમાં હતી ત્યારે તેઓને બાતમી મળી હતી કે, મુંબઇ તરફથી ટેમ્પો નંબર MH/04/LQ/02 71માં વિદેશી દારૂનો જથ્થો મોટા પાર્સલ જેવા બોક્સમાં ભરીને કોસંબા તરફ જઈ રહ્યો છે. જેથી કડોદરા પોલીસની ટીમે કડોદરા નેશનલ હાઇવે 48 પર વોચ ગોઠવી બાતમીવાળો ટેમ્પો આવતા જ ઊભો રાખવા પ્રયાસ કર્યો હતો. પરંતુ પોલીસને જોઈ ટેમ્પો ચાલકે આગળ ભગાવી ટેમ્પો રોડ પર મૂકીને ભાગી છૂટ્યો હતો. પોલીસે ટેમ્પામાં તપાસ કરતા મોટા પાર્સલોમાં ભરેલી વિદેશી દારૂની નાની-મોટી 9480 બોટલ જેની કિંમત રૂપિયા 11,41,200/- તથા ટેમ્પો કિંમત 10 લાખ તેમજ મોબાઈલ 1 નંગ મળી કુલ રૂપિયા 21,46,200/-નો મુદ્દામાલ કબજે કરી ટેમ્પો ચાલકને વોન્ટેડ જાહેર કર્યો હતો.