ઓડિશાના છ જિલ્લામાં વીજળી પડવાની ઘટનાઓમાં ઓછામાં ઓછા 10 લોકોના મોત થયા છે. આ જિલ્લાઓમાં શનિવારે ભારે વરસાદ થયો હતો, એવી એક અધિકારીએ માહિતી આપી હતી.ખુર્દા જિલ્લામાં ચાર, બોલાંગીરમાં બે અને અંગુલ, બૌધ, જગતસિંહપુર અને ઢેંકનાલમાં એક-એક લોકો વીજળી પડવાને કારણે મૃત્યુ પામ્યા હતા, એમ વિશેષ રાહત કમિશનરની કચેરીએ જણાવ્યું હતું. ઓફિસે જણાવ્યું હતું કે વીજળી પડવાને કારણે ખુર્દામાં ત્રણ લોકો ઘાયલ પણ થયા છે. અધિકારીએ જણાવ્યું હતું કે ભુવનેશ્વર અને કટક શહેરો સહિત ઓડિશાના દરિયાકાંઠાના વિસ્તારમાં વીજળીના ચમકારા સાથે ભારે વરસાદ થયો હતો.

નિવેદનમાં જણાવાયું છે કે ચક્રવાતે ચોમાસું સક્રિય કર્યું છે, જેના કારણે સમગ્ર રાજ્યમાં ભારે વરસાદ થયો છે. ભુવનેશ્વર અને કટક શહેરોમાં અનુક્રમે 126 મીમી અને 95.8 મીમી વરસાદ નોંધાયો હતો. તે જ સમયે, હવામાન વિભાગે લોકોને તોફાન દરમિયાન સલામત સ્થળોએ રહેવાની સલાહ આપી છે.ભુવનેશ્વરમાં પ્રાદેશિક હવામાન કેન્દ્રના નિર્દેશક એચઆર બિસ્વાસે જણાવ્યું હતું કે બંગાળની ખાડી પર પણ ચક્રવાતી પરિભ્રમણ રચાયું છે.3 સપ્ટેમ્બરની આસપાસ ઉત્તર બંગાળની ખાડીમાં વધુ એક ચક્રવાતી પરિભ્રમણ સર્જાય તેવી શક્યતા છે.તેના પ્રભાવ હેઠળ, આગામી 48 કલાક દરમિયાન નીચા દબાણનું ક્ષેત્ર બને તેવી શક્યતા છે. તેમણે કહ્યું કે સાયક્લોનિક સરક્યુલેશન અને સંભવિત લો પ્રેશર એરિયાને કારણે આગામી ત્રણથી ચાર દિવસ દરમિયાન ભારે વરસાદ પડી શકે છે.

ઓડિશાના મુખ્યમંત્રી નવીન પટનાયકે શનિવારે ભારે વરસાદની આફતથી પ્રભાવિત હિમાચલ પ્રદેશ માટે 5 કરોડ રૂપિયાની સહાયની જાહેરાત કરી હતી. હિમાચલમાં તાજેતરમાં અવિરત વરસાદ થયો છે, જેના કારણે મોટાપાયે જાન-માલનું નુકસાન થયું છે. આ સહાય મુખ્ય પ્રધાન રાહત ફંડમાંથી આપવામાં આવશે. પટનાયકે હિમાચલના મુખ્ય પ્રધાન સુખવિંદર સિંહ સુખુને પત્ર લખીને સતત વરસાદ અને ભારે પૂરને કારણે લોકોની વેદના અને જાનમાલના નુકસાન અંગે ચિંતા વ્યક્ત કરી છે. પટનાયકે પત્રમાં જણાવ્યું હતું કે, “મારી સરકાર અને ઓડિશાના લોકો સંકટની આ ઘડીમાં હિમાચલના લોકો સાથે મજબૂત રીતે ઉભા છે.” આ નાણાં હિમાચલ પ્રદેશ રાજ્યમાં સમારકામ અને પુનઃસ્થાપન માટે ઉપયોગમાં લેવાશે.