નવસારી-બારડોલી રોડના ગુરુકુળ સુપા આશ્રમ પાસે રેતી ભરેલી ટ્રકના ચાલકે માંડવીના ગોડસંબા ગામની મોપેડ સવાર યુવતીને અડફેટે લઈ કચડી નાખતા તેણીનું ઘટના સ્થળે જ કમકમાટીભર્યું મોત થયું હતું. મળતી માહિતી મુજબ, પૂજાબેન ઈલેશભાઈ પટેલ (ઉ.વ.૨૮, રહે.અમલસાડી, પટેલ ફળિયું, ગોડસંબા ગામ, તા.માંડવી, જિ.સુરત)નવસારીની ખાનગી હોસ્પિટલમાં નોકરી કરતી હતી.

તારીખ 8મી માર્ચ શનિવારના રોજ સાડા ચાર વાગ્યાના અરસામાં પૂજા પટેલ પોતાની મોપેડ લઈને નવસારી-બારડોલી રોડના સુપા ગામના ગુરુકુળ આશ્રમ પાસેથી પસાર થતી હતી. તે વખતે એક રેતી ભરેલી ટ્રકનાં ચાલકે તેની ટ્રક ગફલતભરી રીતે હંકારીને યુવતીની મોપેડને ટક્કર મારી હતી. આ સાથે જ મોપેડના ચાલક પૂજાબેન રોડ ઉપર પડી ગયા હતા અને તે પછી તરત જ ટ્રકના ટાયર નીચે કચડાતા તેને ગંભીર ઈજા થઈ હતી. જેને કારણે તેણીનું સ્થળ પર જ મોત નીપજ્યું હતું. અકસ્માત બાદ ચાલક ટ્રક છોડી ફરાર થઈ ગયો હતો.