સોનગઢનાં ટોકરવા ગૌમુખ રોડ પર ચીમકુવા ગામની સીમમાં પુરઝડપે દોડતા ડમ્પરે બાઈકને સામેથી અડફેટે લઈ લીધી હતી. આ અકસ્માતમાં બાઈક ચાલક ચીમકુવા ગામના નિતેશ ગામીતનું ઘટના સ્થળે મોત નીપજ્યુ હતું. સુત્રો પાસેથી મળતી માહિતી મુજબ, ચીમકુવા ગામના પટેલ ફળિયામાં રહેતો નિતેશ મહેશભાઈ ગામીત (ઉવ.૨૫) તારીખ ૨૧/૦૨/૨૦૨૫ નારોજ સવારે પોતાની બાઈક નંબર જીજે/૨૬/એજી/૭૮૫૬ને લઈ માવો લેવા માટે નજીકના ટોકરવા ગામે ગયો હતો.

તે સમયે ટોકરવા ગૌમુખ રોડ પર ચીમકુવા ગામની સીમમાં પુરઝડપે અને ગફલતભરી રીતે આવતાં ડમ્પર નંબર એમએચ/૩૯/એડી/૦૦૦૨એ  નિતેશની બાઈકને સામેથી અડફેટે લેતા અકસ્માત સર્જાયો હતો જોકે આ અકસ્માતમાં નીતેશને માથા તથા શરીરના ભાગે ગંભીર રીતે ઈજા પહોંચતા તેનું ઘટના સ્થળ પર મોત નિપજયું હતું. બનાવ અંગે પોલીસે ડમ્પરના ચાલક સુરજ હીરાલાલ ગામીત (રહે.ધજ ગામ.તા.ઉચ્છલ)ની સામે ગુનો નોંધી વધુ તપાસ હાથ ધરી હતી.