ડાંગ જિલ્લાનાં વઘઈ તાલુકાના કાંચનપાડા ગામનાં સુમનબેન મહાદુભાઈ બાગુલ (ઉ.વ૩૭) સાપુતારા પોલીસ મથકમાં હોમગાર્ડ તરીકે ફરજ બજાવતા હતાં. તેઓ નોકરી નોકરી પૂર્ણ કરી બપોરના દોઢેક વાગ્યાનાં અરસામાં સાપુતારાથી એક રાહદારી દિનેશભાઈ મંગળ્યાભાઈ પવાર (રહે.બિલમાળ)ની બાઈક ઉપર બેસી શામગહાન ઘરે જવા નીકળ્યા હતાં.

તે વખતે સાપુતારાથી શામગહાનને જોડતા રાષ્ટ્રીય ધોરીમાર્ગનાં સાપુતારા ઘાટમાર્ગનાં હનુમાનજીનાં મંદિર નજીક ચાલુ બાઈક ઉપર અચાનક ચક્કર આવી જતાં બાઈક ઉપરથી નીચે પડી જતા માથાનાં ભાગે ગંભીર ઈજા થઈ હતી. આ હોમગાર્ડ યુવતીને તાત્કાલિક સારવારનાં અર્થે નજીકની શામગહાન સી.એચ.સી. ખાતે ખસેડવામાં આવી હતી. પરંતુ તેણે સારવાર દરમિયાન અંતિમ શ્વાસ છોડી દેતા ફરજ પરના ડોકટરોએ મૃત જાહેર કરી હતી. બનાવ અંગે સાપુતારા પોલીસ દ્વારા અકસ્માતનો ગુનો નોંધી વધુ તપાસ હાથ ધરી હતી.