વલસાડના પારડી તાલુકાના મોતીવાડા રેલવે ઓવરબ્રિજ પાસે ત્રણ રસ્તા નજીક હાઈવે ઉપર વાપીથી વલસાડ જતા રોડ ઉપર અજાણ્યા વાહને આધેડને અડફેટે લેતાં તેમનું મોત થયું હતું.

પ્રાપ્ત થતી વિગતો એવી છે કે, પારડીના મોતીવાડા થાપડી ફળિયા ખાતે રહેતા રાજુભાઈ મોહનભાઈ હળપતિ ગુરૂવારના રોજ સાંજે ખડકી ભંડારવાડ ખાતે તેમના સંબંધીને ત્યાં લગ્નમાં ગયા હતા. ત્યારબાદ પરત ફરતી વેળા તેઓ રસ્તો ઓળંગી રહ્યા હતા. આ સમયે અજાણ્યા વાહને તેમને અડફેટે લીધા હતા. તેથી ગંભીર ઈજાઓ પહોંચતા રાજુભાઈનું સ્થળ પર જ મોત નિપજ્યું હતું. અકસ્માત બાદ સ્થળ પર પહોંચેલી પારડી પોલીસે લાશનો કબજો લઈ કાયદેસરની કાર્યવાહી હાથ ધરી હતી.