સુરતનાં મહુવા તાલુકાનાં શેખપુર ગામે આવેલા તાડ ફળિયામાં રહેતા 60 વર્ષીય વૃદ્ધ ખેડૂતની સાગનાં ઝાડ ઉપર ફાંસો ખાઈ લટકી ગયેલી હાલતમાં લાશ મળી આવતાં પંથકમ ચકચાર મચી ગઈ હતી. બનાવની વિગત એવી છે કે, ગત થોડા સમયથી અસ્થિર મગજનાં હોવાનું જણાવતા ખેડૂત અજીત સન્મુખ ચૌધરી ઘરે કોઈને કશુ પણ જણાવ્યા વગર ઘરેથી જતા રહેતા હતા અને પોતાના ખેતરમાં બેસી રહેતા હતા. જોકે પરિવારજનો તેમને ઘરે લાવી સમજાવીને ઘરે રહેવા તો જણાવતા હતા.

પરંતુ તેઓ ગમે ત્યારે ઘરેથી નીકળી જતા હતા અને બે દિવસ પહેલા તા.7મી એ સાંજનાં સમયે તેઓ પોતાના ઘરેથી નીકળી ગયા બાદ લાંબા સમય સુધી ઘરે પરત આવ્યા ન હતા. તેમની શોધખોળ કરવા છતાં તેઓ મળી ન આવતા તેમના પુત્ર એ તેમનો ફોટો whatsapp ગ્રુપમાં મૂકી તેમના ગુમ થવા વિશે લોકોને જાણ કરી હતી. આ દરમિયાન સવારે શેખપુર ગામે આવેલા ઝાંઝરવાડી ફળિયામાં આવેલા એક સાગનાં ઝાડ ઉપર ફાંસો ખાઈ તેમની લાશ જોવા મળી આવી હતી. તેમના પુત્રએ મહુવા પોલીસને જાણ કરી હતી જેનાં આધારે પોલીસે જરૂરી કાર્યવાહી કરી હોવાનું જાણવા મળેલ છે.