કુકરમુંડાનાં આષ્ટા ગામમાં ઘરના આંગણામાં ઊભેલ ૧૦ વર્ષીય બાળા ઉપર અચાનક દીપડાએ હુમલો કરતા તેણીએ બુમાબૂમ કરતા લોકો ડંડા દોડતા તેમજ બૂમાબૂમ કરતા દીપડો ભાગી ગયો હતો. જોકે માંડમાંડ દીપડાનાં મુખમાંથી બચેલા બાળાને ગળા, મોં, ખભા, હાથ સહિત શરીરના જુદા-જુદા ભાગોમાં પંજા મારવામાં આવતા લોહીલુહાણ થઈ હતી. જેને પ્રાથમિક સારવાર બાદ નંદુરબાર સિવિલ હોસ્પિટલમાં રીફર કરવામાં આવી હતી.

બનાવની વિગત એવી છે કે, નિઝર તાલુકાનાં બોર્ડર વિસ્તારના મહારાષ્ટ્રના જાનીઆંબા ગામમાં બે દિવસ પહેલા ખૂંખાર દીપડાએ મહિલા ઉપર જીવલેણ હુમલો કરી તેણીને લોહીલુહાણ કરવાની ઘટના બની હતી. જેને લઈને નિઝર-કુકરમુંડા તાલુકામાં પણ ભયનો માહોલ રહ્યો હતો. કુકરમુંડા તાલુકાના આષ્ટા ગામના પ્લોટ કળિયામાં રહેતા ગુંજનબેન અવિનાશભાઈ પાડવી (આશરે ઉ.વ.10) મંગળવારના રોજ સાંજના સાડા છ કલાકના અરસામાં પોતાના ઘરના આંગણામાં ઊભી હતી.

તે દરમિયાન અચાનક શિકારની શોધમાં ફરતા દીપડાએ બાળા ઉપર હુમલો કર્યો હતો. બાળાએ દીપડાનો પ્રતિકાર કરવા સાથે બૂમાબૂમ કરી મૂકતા દીપડો બાળાને ઉપાડીને લઈ જઈ શક્યો ન હતો. બાળાની ચીસ સાંભળી પરિવારજનો તેમજ ફળિયાના લોકો દંડો લઈ દોડી આવી દીપડાનો પ્રતિકાર કરતા દીપડો ભાગ્યો હતો. તેમજ માંડમાંડ દીપડાની ચુંગાલમાંથી બચેલી બાળાને શરીર ઉપર ગંભીર ઇજા થઈ હતી. દીપડાએ ગળા, મોં, ખભા, હાય તેમજ શરીરના જુદા-જુદા ભાગમાં પંજાથી ગંભીર ઈજા પહોંચાડી હતી ગંભીર રીતે ઘવાયેલી બાળાને ખાનગી વાહન મારફતે તાત્કાલિક કુકરમુંડા સી.એચ.સી. ખાતે સારવાર માટે લઈ જવામાં આવી હતી. જયાં પ્રાથમિક સારવાર આપ્યા બાદ વધુ સારવાર માટે નંદુરબાર સિવિલ હોસ્પિટલમાં રિફર કરવામાં આવી હતી.