સુરતના ઉમરપાડાના ગુલીઉમર ગામે નિશાળ ફળિયામાં રહેતા ૪૧ વર્ષીય રતિલાલભાઈ ગંભીરભાઈ વસાવા ખેતીકામ કરી પોતાના પરિવારનું ગુજરાન ચલાવે છે. રતિલાલભાઈ ઘરેથી મોટરસાઇકલ લઇને કોલવાણ દૂધ મંડળી ઉપર જઇ રહ્યા હતા. તે દરમિયાન ૮ ઈસમોએ ઈકો ગાડીમાં આવી રતિલાલભાઈને રસ્તામાં રોકી લીધા હતા. આ ૮ ઇસમો પૈકી મહેશ જયસિંગ વસાવાએ રતિલાલભાઈ પાસે આવીને ગામના બધા માણસો દૂધ મંડળીમાં દૂધ ભરે છે તો તું અમારા દૂધમાં જ પાણીનું ભેળસેળ કેમ કાઢે છે, તેમ જણાવી બોલાચાલી કરી હતી.

જોકે રતિલાલભાઈએ હું મારી રીતે તમારા દૂધમાં કોઈ ખોટ કે પાણીનું ભેળસેળ કાઢતો નથી, પરંતુ કોમ્પ્યૂટર મશીનમાં તમારા દૂધનું ફેટ ઓછું આવે છે અને હલકી ગુણવત્તા બતાવે છે તેવું જણાવતા ઉપરોક્ત તમામ ઇસમોએ ઉશ્કેરાઈ જઈ ઈકોમાંથી લાકડી કાઢી રતિલાલને સપાટા મારવા લાગ્યા હતા. રતિલાલભાઈએ બૂમાબૂમ કરતા તેઓ જાનથી મારી નાંખીશું એવી ધમકી આપી ફરાર થઇ ગયા હતા. ઘટના અંગે રતિલાલભાઈએ મહેશ જયસિંગ વસાવા, વિનેશ પ્રભુ વસાવા, નગીન ગનજી વસાવા, પ્રેમ મહેશ વસાવા, સુરેશ પ્રભુ વસાવા, જીજ્ઞેશ માધવ વસાવા, પ્રભુ મોવલિયા વસાવા અને પ્રવીણ (તમામ રહે.કોલવાણ ગામ, તા.ઉમરપાડા, સુરત) વિરુદ્ધ ફરિયાદ નોંધાવી હતી.