સુરત જિલ્લાના પલસાણા તાલુકાના ભુતપોર ગામની સીમમાં નેશનલ હાઈવે નંબર ૫૩ ઉપર કણાવ ગામના યુવાનનું બાઇક સ્લીપ થઈ ડિવાઈડર સાથે અથડાતાં મોત થયું હતું. સુત્રો પાસેથી મળતી માહિતી મુજબ, કણાવ ગામે પારસી ફળિયામાં મહેશ ભાણાભાઈ રાઠોડ (ઉ.વ.૩૩) પિતા ભાણાભાઈ સહિત પરિવાર સાથે રહેતો હતો અને પલસાણા કાલાઘોડા ખાતે આવેલી ગોહિલ કંપનીમાં નોકરી કરતો હતો.

જોકે શનિવારે રાત્રિના સમયે મહેશ પોતાની બાઈક લઈને નેશનલ હાઈવે નંબર ૫૩ ઉપર ભુતપોર ગામની સીમમાંથી પસાર થતો હતો તે સમયે પોતાની બાઈક પૂરઝડપે હંકારી સ્લીપ ખવડાવી દેતાં બાઈક રસ્તાની વચ્ચે આવેલા ડિવાઈડર સાથે અથડાઈ હતી. અકસ્માતમાં રોડ ઉપર પડેલા મહેશ રાઠોડને માથામાં ગંભીર ઇજા થતાં સારવાર માટે સુરત નવી સિવિલ હોસ્પિટલમાં લઈ જતાં સારવાર દરમિયાન ફરજ પરના ડોક્ટરે મહેશ રાઠોડને મૃત જાહેર કરતા પલસાણા પોલીસે મરનાર મહેશ રાઠોડ વિરૂધ્ધ ગુનો નોંધી આગળની કાર્યવાહી હાથ ધરી હતી.