સુરત જિલ્લાનાં માંડવીનાં નવી નગરી ફળિયામાં આંગણવાડીની સામે આવેલા પુલ પાસે તરુણે ૨૦ વર્ષીય યુવક પર ચપ્પુથી જીવલેણ હુમલો કર્યો હતો. યુવકને હોસ્પિટલમાં દાખલ કરાયો હતો જયાં તેની સારવાર ચાલી રહી છે. ઘટના અંગે પોલીસે તરુણ સામે ગુનો નોંધી આગળની તપાસ હાથ ધરી હતી. મળતી માહિતી મુજબ, માંડવીના ગાંધી ફળિયામાં રહેતો યુગ અજિતભાઈ પટેલ (ઉ.વ.૨૦) તેના મિત્રો સાથે લગ્નપ્રસંગે ગયો હતો.

જયાં એક તરુણ તેના મિત્ર જીત સોલંકી સાથે મજાક મસ્તી કરી જોરજોરથી બૂમો પાડતો હતો. આથી યુવકે જોરથી બૂમો ન પાડવા અંગે ટકોર કરી હતી. ત્યારબાદ તેઓ છૂટા પડી ગયા હતા. થોડીવાર પછી તરુણ તેના ઘરેથી ચપ્પુ લઈને માંડવી નવી નગરી ફળિયામાં આવ્યો હતો. રાત્રીના ૧૨.૩૦ વાગ્યાની આસપાસ આંગણવાડીની સામે તેણે તું કેમ મારા પર ગુસ્સે થાય છે એમ કહી પોતાની પાસેનું ચપ્પુ યુગના પેટમાં મારી દીધું હતું. મરણતોલ ઇજા પહોંચતા તે સ્થળ પર ઢળી પડયો હતો. તેને લોહી લુહાણ હાલતમાં તાત્કાલિક હોસ્પિટલ લઈ જવાયો હતો. જ્યાં તેની સારવાર ચાલી રહી છે. પોલીસે યુગની ફરિયાદના આધારે કાયદાના સંઘર્ષમાં આવેલા તરુણ વિરુદ્ધ હત્યાના પ્રયાસનો ગુનો નોંધી આગળની તપાસ હાથ ધરી હતી.