સુરત જીલ્લાના કામરેજના ઉંભેળ ખાતે કંપનીના પહેલા માળે સૂતેલો કામદાર નીચે પડી જતા તેનું ગંભીર ઈજા સાથે ઘટના સ્થળે મોત થયું હતું.

પ્રાપ્ત માહિતી અનુસાર હાલ પલસાણા તાલુકાના કડોદરા ખાતે રહેતો અને મૂળ પ્રયાગરાજ જિલ્લાના દિવાનગંજ (યુપી)નો ૩૫ વર્ષીય મનુ ઉર્ફે મનોજ હુબલાલ ભારતીય (સરોજ) ઉંભેળ ગામની સીમમાં આવેલી પૂજન એમ્બ્રો પાર્ક પ્લોટ નં.૪૭થી ૪૮માં બિલ્ડિંગના પહેલા માળે સૂતો હતો. તે આકસ્મિક રીતે નીચે જમીન પર ધડાકાભેર પટકાયો હતો. તેને ગંભીર ઈજાઓ પહોંચતા સારવાર અર્થે નજીની હોસ્પિટલ ખાતે ખસેડવામાં આવ્યો હતો. જ્યાં ડોક્ટરોએ મનુને મૃત ઘોષિત કર્યો હતો. બનાવ અંગે કામરેજ પોલીસે અકસ્માત મોતનો ગુનો નોંધી આગળની તપાસ હાથ ધરી હતી.