ગાંધીનગર શહેર નજીક આવેલા ચિલોડા હિંમતનગર હાઇવે ઉપર રસ્તો ઓળંગી રહેલ મહુન્દ્રા ગામની મહિલાને કાર ચાલકે અડફેટે લેતા શરીરે ગંભીર ઇજાઓને કારણે તેમનું મોત થયું હતું અને આ ઘટના અંગે પોલીસે કાર ચાલક સામે ગુનો દાખલ કરીને વધુ તપાસ શરૂ કરી હતી. સુત્રો પાસેથી મળતી માહિતી મુજબ, મહુન્દ્રા ગામમાં રહેતા પ્રકાશ દિનેશભાઈ ઠાકોર દ્વારા ફરિયાદ નોંધાવવામાં આવી હતી કે તેમની માતા કૈલાસબેન ગઈકાલે કામ અર્થે ચિલોડા જવા માટે નીકળ્યા હતા.

આ દરમિયાન સવારના સમયે તેના મિત્ર જમીનનો ફોન આવ્યો હતો અને કહ્યું હતું કે તેની માતા કૈલાસબેનને ચિલોડા તરફ જતા રોડ ઉપર અકસ્માત થયો છે. તું જલ્દી આવી જા, જેથી પ્રકાશ તુરંત જ અકસ્માત સ્થળ ઉપર પહોંચ્યો હતો જ્યાં જોયું હતું ૧૦૮ એમ્બ્યુલન્સ આવી પહોંચી હતી અને ગંભીર રીતે ઘાયલ તેમની માતાને સારવાર માટે ગાંધીનગર સિવિલ હોસ્પિટલ ખસેડવામાં આવ્યા હતા. જ્યાં જાણવા મળ્યું હતું કે, તેમની માતા રસ્તો ઓળંગી રહ્યા હતા તે દરમિયાન કાર દ્વારા તેમને ટક્કર મારવામાં આવી હતી બીજી તરફ ગંભીર ઇજાઓને કારણે ફરજ પરના તબીબે કૈલાસબેનને મૃત જાહેર કર્યા હતા. જેથી અકસ્માતની આ ઘટના અંગે હાલ ચિલોડા પોલીસ દ્વારા કારના ચાલક સામે ગુનો દાખલ કરીને વધુ તપાસ શરૂ કરવામાં આવી હતી.