વાપી જીઆઇડીસીની એક કંપનીમાં પહેલા માળે કામ કરી સીડીથી નીચે ઉતરતી વખતે પગ લપસી જતા કામદાર નીચે પટકાયો હતો. જેને હોસ્પિટલમાં લઇ જતા તબીબે મૃત જાહેર કર્યો હતો. સુત્રો પાસેથી મળતી માહિતી અનુસાર, વાપી જીઆઇડીસી ફર્સ્ટ ફેસમાં પ્લોટ નંબર/1/એ સ્થિત ઇન્ડિયા જીલેટીન એન્ડ કેમિકલ્સ લિ.કંપનીમાં નોકરી કરતા અને ભડકમોરા સુલપડ ખાતે જગાભાઇની ચાલીમાં રહેતા ગુલાગ શીવગની ગૌડ (ઉ.વ.53) જે બુધવારે સવારે રાબેતા મુજબ કંપનીમાં કામ કરવા ગયા હતા.

તે સમયે કંપનીમાં પહેલા માળે મશીન ગોઠવેલ હોય ત્યાં આગળ કામ કરવા તેઓ ઉપર ચઢ્યા હતા. જ્યાંથી પરત સીડીથી ઉતરતી વખતે પગ સ્લીપ થઇ જતા 8 ફૂટ ઉપરથી નીચે પટકાતા તેઓને માથામાં ગંભીર ઇજા પહોંચતા લોહી લુહાણ હાલતમાં કામદારને વાપીની હરિયા હોસ્પિટલમાં ખસેડતા ફરજ પર હાજર તબીબે મૃત જાહેર કર્યો હતો. બનાવ અંગે મૃતકના પુત્રએ જીઆઇડીસી પોલીસમાં મથકમાં જાણ કરી હતી.