સુરતના ઓલપાડ પોલીસ સ્ટેશનના આર્મ એક્ટના ગુનામાં તથા યુ.પી.ના ભદોહી પોલીસ સ્ટેશનના ગુનામાં વોન્ટેડ આરોપી રોહિત વાંસફોડિયા ઉર્ફે રોહિત બુચાને કડોદરા પોલીસની ટીમે અંત્રોલી ગામે ભૂરી ફળિયા ખાતેથી ઝડપી પાડ્યો હતો.

સુત્રો પાસેથી મળતી માહિતી મુજબ, ગત તા.7 જાન્યુઆરી 2021ના રોજ ઓલપાડ તાલુકાનાં અટોદરા ગામની હદમાં સ્વર્ગ રેસીડન્સી ખાતે આવેલ એક મકાનમાંથી ઈશ્વર રમેશ વાંસફોડિયા (રહે.અંત્રોલી, ભૂરી ફળિયા,તા.પલસાણા) નાને પોલીસે દેશી હાથ બનાવટની પિસ્તોલ તેમજ જીવતા કારતૂસ તેમજ એક કાર અને મોબાઇલ સાથે ઝડપી પાડ્યો હતો. જ્યારે આ દેશી પિસ્તોલ તથા કારતૂસ આપનાર રોહિત દિનેશ વાંસફોડિયાને પોલીસે વોન્ટેડ જાહેર કર્યો હતો. ત્યારબાદ કડોદરા જી.આઈ.ડી.સી પોલીસની ટીમને મળેલ બાતમીના આધારે પોલીસે અંત્રોલી ભૂરી ફળિયા ખાતેથી રોહિત ઉર્ફે રોહિત બુચો દિનેશ વાંસફોડિયાને પકડી પાડ્યો હતો. પકડાયેલ આરોપી રોહિત યુ.પી.ના ભદોહી પોલીસ સ્ટેશનના ગુનામાં પણ વોન્ટેડ હતો. પોલીસે આ અંગે ગુનો નોંધી આગળની વધુ કાર્યવાહી હાથ ધરી હતી જ્યારે આ ગુનામાં સંડોવાયેલ પ્રવીણ સોમા વાંસફોડિયાને વોન્ટેડ જાહેર કર્યો હતો.