સુરત જિલ્લાનાં કામરેજનાં કોસમાડી ગામની સીમમાંથી પસાર થઈ રહેલા બાઈક ચાલકને સ્કૂલ બસે ટક્કર મારી હતી. તેથી તેના પર સવાર બે લોકોને ગંભીર ઈજા થઈ હતી. ઘટના અંગે કામરેજ પોલીસે કસુરવાર ચાલક વિરૂદ્ધ ગુનો નોંધી તપાસ હાથ ધરી હતી. મળતી માહિતી અનુસાર, સહદેવભાઈ સુરેશભાઈ વસાવા (ઉ.વ.૧૯) તેના મિત્ર સંતોષભાઈ કરમસિંગભાઈ વસાવા સાથે કેટીએમ ૨૦૦ ડયુક બાઇક લઈને કોસમાડી ગામની સીમમાં કોસમાડીથી મોરથાણા જતા રોડ ઉપરથી પસાર થઈ રહ્યા હતા. જે દરમિયાન પાછળથી પુરઝડપે આવી રહેલી સ્કૂલ બસનાં ચાલકે સહદેવભાઈની બાઈકને અડફેટમાં લઈ અકસ્માત કર્યો હતો. જે બાદ ચાલક બસ લઈને ફરાર થઈ ગયો હતો. ઘટનામાં બાઈક પર સવાર સહદેવભાઈ અને તેમનાં મિત્ર સંતોષભાઈને શરીરનાં વિવિધ ભાગે ગંભીર ઇજાઓ પહોંચતા તેમને સારવાર અર્થે નજીકની હોસ્પિટલ ખાતે ખસેડવામાં આવ્યા હતા. ઘટના અંગે કામરેજ પોલીસે કસુરવાર ચાલક વિરૂદ્ધ ગુનો નોંધી તપાસ હાથ ધરી હતી.