સુરતનાં માંગરોળનાં નવી પાલોદ ગામે જુના ઝઘડાની અદાવતમાં બે ઇસમોએ ચપ્પુ અને લાકડીનાં સપાટા વડે બે મિત્રો પર હુમલો કરી જાનથી મારી નાંખવાની ધમકી આપી હતી. મળતી માહિતી મુજબ, માંગરોળ તાલુકાનાં પાલોદ ગામે સપના નગર ખાતે રહેતા મહમદ અસ્લમ અબ્દુલ રહીમ ખાન તેમનાં મિત્ર ઉસ્માન વલી સાથે પાલોદ ગામની સીમમાં વાય.ડી.પેટ્રોલ પંપ ખાતે ઉભા હતા. ત્યારે મહમદ અસ્લમની તેના મિત્ર ઉસ્માન વલીનાં સાટુ ભાઈનાં દિકરા અરબાઝ અનીશ શેખ સાથે પેટ્રોલ ભરવા બાબતે સામાન્ય બોલાચાલી થઈ હતી.

ત્યારબાદ મહમદ અસ્લમ મિત્ર ઉસ્માન વલી સાથે પાલોદ ગામની સીમમાં કબસ્તાન પર ઉભા હતા. ત્યાં આશીફ અકીલ સલમાની અને મહમદ જીશાન મહમદ એઝાદ સલમાની આવી જણાવ્યું કે પેટ્રોલ પંપ પર જે બોલાચાલી થઈ તે બાબતે તું કીમ ચાર રસ્તા આવી માફી માંગી લે. ત્યારે મહમદ અસ્લમે ગઇ કાલે સમાધાન થઈ ગયું હોય તો આજે ફરી શું કામ માફી માંગીએ જેવું જણાવતા ઉશ્કેરાઈને બંને શખ્સોએ મહમદ અસ્લમ અને ઉસ્માન વલીને ગાળો આપી હતી. જયારે આશીફ સલમાનીએ તેનાં ખીસ્સામાંથી ચપ્પુ કાઢી હુમલો કર્યો અને મહમદ જીશાને લાકડીનાં સપાટા વડે મારમારી જાનથી મારી નાંખવાની ધમકી આપી ફરાર થઈ ગયા હતા. આ ઘટના અંગે મહમદ અસ્લમ અબ્દુલ રહીમ ખાને કોસંબા પોલીસ મથકે આશીફ અકીલ સલમાની અને મહમદ જીશાન મહમદ એઝાદ સલમાની (બંને રહે.પાલોદ ગામ તા.માંગરોળ) વિરૂદ્ધ ફરિયાદ નોંધાવી હતી.