વલસાડ પોલીસ અધિક્ષકની સૂચના અને વલસાડ એલસીબી પીઆઈના માર્ગદર્શન હેઠળ એલસીબીની ટીમ પેટ્રોલિંગમાં હતી. ત્યારે ઉદવાડા પરિયા રોડ ઓરવાડ પીએચસી પાસેથી સફેદ કલરની રેનોલ્ટ ડસ્ટર કાર દારૂના જથ્થા સાથે ઝડપાઈ હતી. વલસાડ જિલ્લા એલસીબીની ટીમને ખાનગી રાહે બાતમી મળતા ઓરવાડ પાસે વોચ ગોઠવી હતી.

તે દરમિયાન સફેદ કલરની રેનોલ્ડ ડસ્ટર કાર નંબર જીજે/૨૧/એએચ/૭૧૩૫ને ઉભી રાખવા ઈશારો કરતા ચાલકે યુ-ટર્ન મારી ભાગી છુટવાની પેરવી કરી હતી. તેથી તેની કાર દિવાલ સાથે અથડાઈ ગઈ હતી. ત્યારબાદ પોલીસે કારને ચેક કરતા દારૂની કુલ ૪૪૪ બોટલ (કૂલ કિંમત રૂપિયા ૬૦,૦૦૦) મળી આવી હતી. આખરે પોલીસે કારનો ચાલક ચેહરાભાઈ મગનભાઈ દેસાઈ (રહે.સીતારામ નગર, સિંધી કેમ્પર રોડ, નવસારી) તથા દિલીપ ગણપતભાઈ વસાવા (રહે. સીતારામ નગર, નવસારી)ની અટક કરી હતી.

આરોપીની પૂછપરછ કરાતા કારમાં દારૂનો જથ્થો ભરીને વિશાલ સંજય હિંગડે (રહે.નવસારી)એ સેલવાસ બસ સ્ટેન્ડ પાસેથી કાર આપી હતી અને કડોદરા રેલવે બ્રિજ પહોંચાડવાની હોવાનું બહાર આવ્યું હતુ. પોલીસે બંને આરોપીઓ અને દારૂનો જથ્થો (કિંમત રૂપિયા ૬૦,૦૦૦) તથા મોબાઈલ ફોન (કિંમત રૂપિયા ૫૦૦O) અને ડસ્ટર કાર (કિંમત રૂપિયા ૩ લાખ) મળી કુલ ૩.૬૫ લાખનો મુદ્દામાલ કબજે લઈ વધુ કાર્યવાહી હાથ ધરી હતી.