ડોલવણ પાટીકુવા ફળિયાના ખેડૂતે પોતાના ખેતરમાં આંબાના ઝાડ સાથે નાયલોનની દોરી બાંધી કોઈક અગમ્ય કારણસર ગળે ફાંસો ખાઈ જીવન ટૂંકાવી લેતા પરિવારજનોમાં ગમગીન છવાઈ ગઈ હતી.

ડોલવણ ગામના પાટીકુવા ફળિયામાં રહેતા 46 વર્ષીય સન્મુખભાઈ બાબુભાઈ ગામીત ખેતીકામ કરી પરિવારનું ગુજરાન ચલાવતા હતા. સન્મુખભાઈ સાંજે ઓલણ નદી પાસે આવેલા પોતાના ખેતરમાં જઈ ગળે ફાંસો ખાઈ જીવન ટુંકાવી લીધું હતું. સન્મુખભાઈ કોઈક કારણસર હતાશ રહેતા હતા જે કારણે પોતાના જ ખેતરમાં આવેલા આંબાના ઝાડ સાથે નાયલોનની દોરી બાંધી ગળે ફાંસો ખાધો હતો. આંબાના ઝાડ સાથે મૃતદેહ લટકેલો જોતા આસ-પાસનાં લોકોએ ડોલવણ પોલીસને જાણ કરી હતી. આ ઘટનાની જાણ થતા પોલીસ ઘટના સ્થળે આવીને કાયદેસરની કાર્યવાહી હાથ ધરી હતી.