સુરત શહેરનાં અડાજણ વિસ્તારમાં આવેલા ગંગેશ્વર મહાદેવ મંદીરની પાછળ સેન્ટમાર્ક સ્કૂલની સામે ગોવર્ધન પાર્ક સોસયટી ઘર નંબર-A/10નાં પાર્કિંગ અને ઘરમાંથી પોલીસે 4.85 લાખના દારૂ સાથે મહિલા સહિત બે જણાને ઝડપી પાડી કાર્યવાહી હાથ ધરી હતી. અડાજણ પોલીસે જણાવ્યું હતું કે, ગોવર્ધન પાર્ક સોસાયટીનાં પાર્કિંગમાં પાર્ક વરના કાર નંબર જીજે/05/આરએચ/5098માં દારૂનો જથ્થો છુપાડવામાં આવ્યો હોવાની બાતમી મળતા પોલીસે સ્થળ પર જઈ તપાસ કરતા કારમાંથી હાય બ્રાન્ડ દારૂની બોટલો મળી આવી હતી. જોકે આ દારૂ સેલવાસ અને દમણથી વેચાણ માટે લવાયો હોવાનું પ્રાથમિક તપાસમાં બહાર આવ્યું હતું.ત્યારબાદ પોલીસે ઝડપી પાડેલ અશોકભાઇ નમુભાઇ પટેલ (રહે.કોળી વાડ,બલીઠ ગામ,વાપી)ને  પૂછપરછમાં દારૂનો જથ્થો આજ સોસાયટીમાં રહેતા ફાલ્ગુનીબેન જયેશભાઇ ઠકોરદાસ રેતીવાલાની માટે લાવ્યો હોવાની માહિતી બહાર આવતા ફાલ્ગુનીબેનના ઘરની પણ તપાસ કરતા મોટી સંખ્યામાં દારૂની બોટલો અને પાઉચ મળી આવ્યા હતા. આમ, પોલીસે દારૂની કુલ 3896 બોટલો મળી આવી હતી જેની કીંમત રૂપિયા 4,85,300/-નો મુદ્દામાલ કબ્જે કરી એક કાર, 1 નંગ મોબઈલ ફોન, વેચાણના રોકડા રૂપીયા 8,850/- મળી કુલ રૂપિયા 14,94,650/-ના મુદ્દામાલ સાથે બંનેની અટકાયત કરી આગળની કાર્યવાહી હાથ ધરી હતી.