બારડોલીના શાસ્ત્રી રોડ પર આવેલા ક્રિના ફ્લેટમાં બંધ મકાનને નિશાન બનાવી તસ્કરો સોના ચાંદીના દાગીના અને રોકડ રકમ ચોરી કરી ગયા હતા. ફ્લેટમાં રહેતું વૃદ્ધ દંપતી પૈકી પત્ની બીમાર હોય સારવાર માટે વડોદરા ગયા હતા.

સુત્રો પાસેથી મળતી માહિતી અનુસાર, બારડોલીના શાસ્ત્રી રોડ પર આવેલ ક્રિના એપાર્ટમેન્ટમાં રહેતા વિજય વિનાયક દેશપાંડે (ઉ.વ.63) કડોદરા ખાતે ખાનગી કંપનીમાં સુપરવાઈઝર તરીકે નોકરી કરતા હતા. પરંતુ થોડા દિવસ પહેલા તેમની પત્ની સુષ્માબેનને હાર્ટ એટેક આવતા તેમની સારવાર માટે વડોદરા ખાતે રહેતી પુત્રી સપનાબેનના ઘરે રહેવા ગયા હતા. છેલ્લા ત્રેવીસ દિવસથી તેઓ ત્યાં જ રહેતા હતા. દરમિયાન મંગળવારે રાત્રે બારડોલી ખાતેના તેમના ફ્લેટને તસ્કરોએ નિશાન બનાવ્યો હોવાનો પડોશીએ જાણ કરતા તેઓ પત્ની અને સાસુ સાથે બારડોલી આવ્યા હતા. ઘરમાં જોતા અંદર તમામ સામાન વેરવિખેર પડેલો હતો અને 6 થી 7 જોડી સોનાની બુટ્ટી, દોઢ તોલાનું સોનાનું મંગળસૂત્ર, 6 થી 7 સોનાની વીંટી, 2 જોડી ચાંદીના કડા, 1 જોડ ચાંદીના પાયલ, 2 મોટા ચાંદીના દિવા, 2 ચાંદીની દિવી, 2 ઝૂડા ચાંદીના, 10 થી 12 ચાંદીના સિક્કા, 8 થી 10 હજાર રોકડા અને 50 અમેરિકન ડોલર ચોરી કરી નાસી છૂટ્યા હતા. વિજયભાઈએ બારડોલી પોલીસ સ્ટેશનમાં ફરિયાદ આપતા પોલીસે આગળની તપાસ હાથ ધરી હતી.