સુરત જિલ્લાના માંડવી તાલુકાના આંબા ગામે દીપડો દેખાતા વનવિભાગ દ્વારા પાંજરું ગોઠવવામાં આવ્યું હતું. જેમાં બપોરના સમયે 5 વર્ષીય દીપડો પાંજરે પુરાતા ગ્રામજનોએ હાશકારો અનુભવ્યો હતો.

સુત્રો પાસેથી મળતી માહિતી અનુસાર, માંડવી તાલુકાનાં આંબા ગામની હદમાંથી અવાર-નવાર દીપડો નજરે પડી રહયો હતો અને આ દીપડો પાલતુ પશુઓનો શિકાર કરતાં ગ્રામજનોએ માંડવી વનવિભાગના રાઉન્ડ ફોરેસ્ટરને જાણ કરતાં પાંજરું ગોઠવવામાં આવ્યું હતું. પાંજરું ગોઠવ્યાના એક સપ્તાહ બાદ મારણ ખાવાની લાલચે બપોરના 1:30 વાગ્યાની આસપાસ 5 વર્ષીય દીપડો પાંજરે પુરાયો હતો. ઘટનાની જાણ વનવિભાગને થતાં તેમણે દીપડાનો કબ્જો મેળવી તેનું તબીબી પરીક્ષણ કરી દૂર જંગલમાં છોડવાની કામગીરી હાથ ધરી હતી.