સુરતના ઓલપાડ તાલુકાનાં સોંદામીઠા ગામના એક ખેડૂત ટ્રેકટર લઈ ખેતરે જઈ રહ્યા હતા. તે સમયે સોંદામીઠાથી ટકારમાં જતાં માર્ગ ઉપર વળાંકમાં ટ્રેકટર પલ્ટી જતાં ખેડૂતનું મોત નીપજયું હતું.

સુત્રો પાસેથી મળતી માહિતી અનુસાર, ઓલપાડનાં સોંદામીઠા ગામે ગરાસ ફળિયામાં રહેતા પ્રવિણસિંહ ખુમાનસિંહ મહિડા (ઉ.વ.58) નાઓ ગતરોજ સવારના સમયે ટ્રેકટર નંબર જીજે/05/એએ/6549 લઈને ખેતરે જવા નીકળ્યા હતા. તે સમયે સોંદામીઠાથી ટકારમાં જતાં માર્ગ ઉપર આવેલ વળાંકમાં ટ્રેક્ટર પલ્ટી ગયું હતું. જયારે સર્જાયેલ આ અકસ્માતમાં પ્રવિણસિંહ મહિડાને માથામાં તેમજ શરીરના ભાગે ગંભીર ઇજા પહોંચતા તેમનું મોત નીપજયું હતું. બનાવ અંગે ઓલપાડ પોલીસે આગળની કાર્યવાહી હાથ ધરી હતી.