વિશ્વમાં ભારે હોબાળો મચાવનાર ઓમિક્રોન વોરિયન્ટની ભારતમા એન્ટ્રી થયા પછી જામનગરમાં શંકાસ્પદ કેસ મળી આવ્યા છે જેથી સુરત નવી સિવિલ હોસ્પિટલનું તંત્ર પણ એલર્ટ થઇ ગયુ છે. સુરત નવી સિવિલ હોસ્પિટલના તબીબી અધિક્ષક ડો.ગણેશ ગોવેકરે કહ્યું કે, ઓમિક્રોન વોરિયન્ટના લીધે ગતરોજ કોરોના નોડલ ઓફિસર ડો.અશ્વિન વસાવા સહિતના સિનિયર ડોકટરો સાથે ચર્ચા કરવામાં આવી હતી. જેમાં તાકીદે  સિવિલની સ્ટેમસેલ બિલ્ડિંગના ત્રીજા અને દસમાં માળે 83 બેડની વ્યવસ્થા કરવામાં આવી છે અને ત્યાં વેન્ટિલેટર સહિત જરૂરી સાધનો ઉપલબ્ધ કરવામાં આવી રહ્યા છે. આ ઉપરાંત સિવિલની વિવિધ બિલ્ડીંગમાં કોરોનાનાં 3000થી વધુ દર્દીઓને સારવાર મળી રહે તે માટે વ્યવસ્થા કરવામાં આવી રહી છે. હાલમાં સ્ટેમસેલ બિલ્ડિંગમાં કોરોનાના 6 દર્દી સારવાર લઈ રહ્યા છે. જ્યાં 12 રેસિડન્ટ ડોક્ટર, 2 કન્સલટન્ટ,2 ફેકલ્ટી, 5 ઇન્ટર્ન ડોક્ટર, 22 નર્સિંગ સ્ટાફ, 25 થી 30 સર્વન્ટ ફરજ બજાવી રહ્યા છે.