સરથાણા સાંવલીયા સર્કલ નજીકથી પોલીસે બાતમીના આધારે દારૂ ભરેલા ટેમ્પો ઝડપી પાડ્યો હતો. પોલીસને જાઇ ડ્રાઇવર ટેમ્પોને મુકીને ભાગવામાં સફળ રહ્યો હતો. પોલીસે દારૂ અને ટેમ્પો મળી કુલ રૂપિયા ૫.૩૩ લાખથી વધુની મત્તા કબ્જે કરી છે.

સુત્રો પાસેથી મળતી માહિતી અનુસાર, સરથાણા પોલીસને બાતમી મળી હતી કે, સાંવલીયા સર્કલ રાધે પાર્ક રોડ પાસેથી જીજે/૧૬/એવી/૧૬૭૧ નંબરના ટેમ્પામાં ડ્રાઇવર દારૂનો જથ્થો લઇને પસાર થવાનો છે. જે બાતમીના આધારે પોલીસે વોચ ગોઠવી હતી. ઉપરોકત નંબરનો ટેમ્પો આવ્યો હતો. જોકે ડ્રાઇવરે પોલીસને જોઈ ટેમ્પો બિનવારસી હાલતમાં મુકીને ભાગી છુટ્યો હતો. પોલીસે ટેમ્પાનો કબ્જા લઇ અંદર તલાસી લેતા રૂપિયા ૨.૩૩ લાખથી વધુ મત્તાની ૩,૪૫૬ દારૂની બોટલ મળી આવી હતી. પોલીસે દારૂનો જથ્થો અને ટેમ્પો મળી કુલ રૂપિયા ૫.૩૩ લાખનો મુદ્દામાલ કબ્જે કર્યો હતો. પોલીસે નંબરના આધારે ટેમ્પા માલિકની વિગતો મેળવી હતી. જેમાં ડિંડોલી વિસ્તારમાં રહેતો ભગવાન મારવાડીનો ટેમ્પો હોવાનું સામે આવ્યુ હતુ. પોલીસે તેને વોન્ટેડ જાહેર કરી વધુ તપાસ હાથ ધરી હતી.