સુરતનાં ઓલપાડ તાલુકાનાં સાયણ ગામે આવેલ સિદ્ધિ વિનાયક રેસિડન્સીમાં રહેતો યુવક રાત્રિનાં સમયે ધાબા ઉપર સુવા ગયો હતો. તે સમયે કોઈ અજાણ્યો તસ્કર યુવકનાં મોબાઈલની ચોરી કરી ગયો હતો. સુત્રો પાસેથી મળતી માહિતી અનુસાર, ઓલપાડનાં સાયણ ગામે સિદ્ધિ વિનાયક રેસિડન્સીમાં રહેતા હર્ષવર્ધન રાઘવેન્દ્રકુમાર શુક્લા (ઉ.વ.20) કે જેઓ છૂટકમાં ફેરી કરી કપડાનું વેચાણ કરી ગુજરાન ચલાવે છે.

જોકે તેઓ ગત તા.23 મે ના રોજ કઠોર આંબોલી વિસ્તારમાં કપડાનો વેપાર કરી રાત્રિના 10:30 વાગ્યે ઘરે પરત ફર્યો હતો અને રાત્રિનાં જમી પરવારીને ધાબા ઉપર સૂતો હતો. તેની સાથે સોસાયટીનાં અન્ય કેટલાક લોકો પણ સૂતા હતા. ત્યારે રાત્રિનાં સમયે કોઈ અજાણ્યો તસ્કર આ હર્ષવર્ધનનાં મોબાઈલ ફોનની ચોરી કરી ગયો હતો અને વહેલી સવારે યુવકે જાગીને જોતાં તેનો મોબાઈલ ફોન નજરે ન પડતાં તેણે શોધખોળ કરી હતી પરંતુ ભાળ ન મળતા તેણે આખરે ઓલપાડ પોલીસ સ્ટેશનમાં ફરિયાદ નોંધાવી હતી.