સુરત શહેરના અલગ-અલગ વિસ્તારમાં નોકરાણી તરીકે કામ કરતી બે મહિલાઓએ સંખ્યાબંધ ઘરમાં ચોરી કર્યું હોવાનું સામે આવ્યું છે. ટીના પાસવાન અને ભારતી નિશાદ નામની બંને મહિલાઓ સામે ઉમરામાં પહેલી નોકર ચોરીની ફરિયાદ નોંધાયા બાદ વધુ ત્રણ ચોરીના ગુના નોંધાયા છે. બંને મહિલાઓએ અડાજણમાં પણ એક યાદવ પરિવારના ઘરે નોકરાણી તરીકે કામ કરી ઘરમાંથી 55  હજારની ચોરી કરી ફરાર થઇ ગઇ હતી. બંને મહિલાઓ સામે પરિણીતાએ ફરિયાદ નોંધાવતા અડાજણ પોલીસે નોકર ચોરીનો ગુનો નોંધયો હતો. 

સુત્રો પાસેથી મળતી માહિતી મુજબ, અડાજણ પાલ તળાવ નજીક સિધ્ધાચલ વેસ્ટર્ન હાઇટ્સમાં રહેતા શૈલેન્દ્રકુમાર રાજબહાદુર યાદવની 44 વર્ષીય પત્ની સપુનમના ઘરમાં તેઓએ ટીના પાસવાન તથા ભારતી નિશાદ નામની બે મહિલાઓને કામ પર રાખી હતી. ગત તારીખ 8/6/2021 થી કામ પર આવ્યા બાદ તારીખ 18/08/2021ના સમયગાળા દરમિયાન બંને નોકરાણીએ સપૂનમબેનની નજર ચૂકવી ઘરમાં હાથફેરો કર્યો હતો. બંને નોકરાણીએ પરિણીતાના બેડરૂમમાં મુકેલ લોખંડનો કબાટમાંથી એક સોનાનુ મંગળસૂત્ર તથા કાનના ઝૂમખા તેમજ સોનાની બે વીંટીં મળી કુલ રૂપિયા 55,091/- મત્તાની ચોરી કરી ફરાર થઇ ગઇ હતી. જોકે, ગતરોજ સવારે આ વાતની જાણ થતા સપૂનમે અડાજણ પોલીસ મથકમાં પોલીસ ફરિયાદ નોંધાવી હતી. બનાવને પગલે પોલીસે બંને સામે નોકર ચોરીનો ગુનો નોંધી કાયદેસરની કાર્યવાહી હાથ ધરી છે.