કોરોનાની મહામારીને પગલે મોટા ભાગના ગરીબ અને શ્રમિકોના રોજગાર ધંધા અને નોકરીઓ પડી ભાંગી છે ત્યારે પરિવારનું ગુજરાન ચલાવવા માટે ઘણા ખરાં શાકભાજી અને ફ્રુટ સહિતનું વેચાણ કરીને બે ટંકનું પેટ ભરવા મજબુર બન્યા છે. આ દરમિયાન ગતરોજ કતારગામ ખાતે ગજેરા સર્કલ નજીક સર્વિસ રોડ પર ફ્રુટનું વેચાણ કરનારા લારીઓનું દબાણ દુર કરવા પહોંચેલા ઝોનના કર્મચારીઓએ મનસ્વી રીતે આ લારીઓમાં મુકવામાં આવેલા સફરજન-સીતાફળ સહિતના ફ્રુટો રસ્તા પર ફેંકી દીધા હતા. જેને પગલે આ લારીવાળાઓને ભારે નુકસાન થવા પામ્યું હતું. સમગ્ર ઘટનાનો વીડિયો સોશ્યલ મીડિયામાં વાયરલ થતાં મનપાના દબાણ ખાતાના વિભાગ દ્વારા આ પ્રકારની દાદાગીરી વિરૂદ્ધ ભારોભાર આક્રોશ ફાટી નીકળ્યો છે. બીજી તરફ મનપાના દબાણ વિભાગના સ્ટાફ દ્વારા પણ લારીવાળાઓ દ્વારા દાદાગીરી કરવામાં આવી હોવાનો ખુલાસો કરવામાં આવ્યો હતો.