સુરતના પલસાણા તાલુકાનાં બારાસડી ગામની સીમમાં બારડોલીથી કડોદરા તરફ જતાં માર્ગ ઉપર કોઈ અજાણ્યા વાહન ચાલકે એક એક્ટિવા ચાલકને અડફેટે લેતા તેનું ઘટના સ્થળે મોત નીપજયું હતું. સુત્રો  પસેથિએ મળતી માહિતી અનુસાર, મૂળ રાજસ્થાનના વતની અને હાલ પલસાણાનાં બગુમરા ગામની સીમમાં હલધરું પાટીયા નજીક સિલ્વર પોઈન્ટ સર્વોત્તમ હોટલની બાજુમાં રહેતા અનિલભાઈ રામેશ્વરલાલ ખંડેલવાલ (ઉ.વ.49) જે એક્ટિવા મોપેડ નંબર જીજે/01/જેએક્સ/5789 ઉપર સવાર થઈ બારાસડી ગામની સીમમાં બારડોલી કડોદરા રોડ ઉપરથી પસાર થઈ રહ્યા હતા.

તે સમયે પૂરઝડપે હંકારી આવેલ કોઈ અજાણ્યા વાહન ચાલકે એક્ટિવાને અડફેટે લીધી હતી જયારે સર્જાયેલ આ અકસ્માતમાં અનિલભાઈને માથામાં તેમજ શરીરના અન્ય ભાગે ગંભીર ઇજા પહોંચતા તેમનું ઘટના સ્થળે મોત નીપજયું હતું. બનાવ અંગે પલસાણા પોલીસે ગુનો નોંધી આગળની કાર્યવાહી હાથ ધરી હતી.