સુરત જિલ્લાના માંગરોળ તાલુકાના વેલાછા ગામે આવેલ સુરત ડિસ્ટ્રીક્ટ બેન્કના એટીએમ મશીનના રૂમમાં પ્રવેશેલા ચોરટાઓ  માત્ર 13 મિનિટમાં જ 8.90 લાખની ચોરી કરી ફરાર થઈ ગયા હતા. ચોરીની કારમાં પંચર પડી જતા ચોરટાઓ કાર રોડની સાઈડમાં મૂકી ગામમાં આવ્યા હતા અને સ્થાનિકની ઇકો કાર લઈ ભાગી છૂટ્યા હતા. આ ચોરીની સમગ્ર ઘટના સીસીટીવી કેમેરામાં કેદ થઈ હતી.

સુત્રો પાસેથી મળતી માહિતી અનુસાર, માંગરોળ તાલુકાનાં વેલાછા ગામે આવેલ સુરત ડિસ્ટ્રિક્ટ બેન્કના ATMને ચોરટાઓ નિશાન બનાવ્યું હતું. માંગરોળના વેલાછા ગામે મોડી રાત્રે ઇકો કારમાં આવેલા 5 થી 6 અજાણ્યા શખ્સોએ ATM મશીનના રૂમમાં પ્રવેશ કર્યો હતો અને મશીન ગેસ કટર વડે તોડી નાખ્યું હતું અને 8 લાખ 90હજાર રૂપિયા ભરેલી સ્ટ્રે લઈ ભાગી ગયા હતા. માત્ર 13 મિનિટમાં 8.90 લાખની ચોરી કરી ચોરટાઓ કારમાં ભાગી રહ્યા હતા. તે સમયે ઇકો કારમાં પંચર પડ્યું હતું અને ચોરટાઓ કાર રોડની સાઇડમાં મૂકી દીધી હતી અને ફરી ગામમાં આવી એક વ્યક્તિની ઇકો કાર લઈ ભાગી ગયા હતા. આ ચોરીની ઘટના સીસીટીવી કેમેરામાં કેદ થઈ હતી. ઘટના અંગે પોલીસે ગુનો નોંધી આગળની કાર્યવાહી હાથ ધરી હતી.