સુરતના વરાછા પોલીસને બાતમી મળી હતી કે, જીજે/05/એકસ/2793 નંબરની મોપેડ પર એક યુવક દારૂનો જથ્થો લઇને વરાછા અર્ચના સ્કુલ પાસેના ઓવરબ્રિજ નીચેથી પસાર થવાનો છે. આ હકીકતના આધારે પોલીસે વોચ ગોઠવી મોપેડ સાથે યુવકને ઝડપી પાડ્યો હતો. પોલીસે તેની પુછપરછ કરતા કડોદરા અનુપમ રેસીડેન્સીમા રહેતો અશોકકુમાર બાબુલાલ બિસ્નોઇ હોવાનું જણાવ્યુ હતુ. ત્યારબાદ પોલીસે મોપેડની તલાસી લેતાં ડીકીમાંથી રૂપિયા 24 હજારની 240 નંગ દારૂની બોટલ મળી આવી હતી. પોલીસે આ દારૂના જથ્થા અંગે વધુ પુછપરછ કરતા પુનમ જાટ નામના બુટલેગરનો દારૂનો જથ્થો હોવાનુ જણાવ્યુ હતુ. પોલીસે તેને વોન્ટેડ જાહેર કરી દારૂનો જથ્થો, મોપેડ વગેરે મળી કુલ રૂપિયા 38,400/-નો મુદ્દામાલ કબ્જે કરી કાર્યવાહી હાથ ધરી હતી.