સુરતના મહુવા તાલુકાના વેલણપુરથી કાંકરિયા તરફ જતા માર્ગમાં વેલણપુર ગામની સીમમાં મોટરસાયકલ રેલિંગ સાથે અથડાતાં ગંભીર અકસ્માત સર્જાયો હતો જેમાં મોટરસાયકલ સવાર એક યુવકનું ઘટના સ્થળે જ મોત નીપજ્યું હતું જયારે અન્ય બે યુવકોને ઇજા થતા તેમને સારવાર માટે ખસેડવામાં આવ્યા હતા.

બનાવની વિગત એવી છે કે, મહુવાના કાંકરિયા ગામે રહેતો આકાશ નીતિનભાઈ પટેલ (ઉ.વ.24) જે પોતાના મિત્રો જૈનિષ અને સાહિલ સાથે ગત તા.02જી ઓક્ટોબરના રોજ વેલણપુરથી કાંકરિયા તરફ જતા માર્ગ પર આવેલ વેલણપુર નહેર પર નાસ્તો કરવા મોટરસાયકલ નંબર જીજે/19/એક્યુ/1595 ઉપર જતાં હતા. તે દરમિયાન સોનાઇમોરા ખાતે મોટરસાયકલના ચાલકે સ્ટેરીંગ પરથી કાબુ ગુમાવતા મોટરસાયકલ રસ્તાની બાજુમાં આવેલ રેલિંગ સાથે ધડાકા ભેર અથડાતાં ગંભીર અકસ્માત સર્જાતા આ અકસ્માતમાં કાંકરિયા ગામે રહેતો આકાશ પટેલને ગળાના ભાગે ગંભીર ઇજા થતા તેમનું ઘટના સ્થળે જ કરુણ મોત નીપજ્યું હતું જ્યારે મોટરસાયકલ સવાર અન્ય બે યુવાનોને ઇજા થતા ટાંકલ પીએચસી ખાતે સારવાર માટે ખસેડવામાં આવ્યા હતા.