સુરત શહેરનાં ગોડાદરા વિસ્તારમાં એક એપાર્ટમેન્ટના ત્રીજા માળના ફ્લેટમાં સવારે ગેસ લીકેજથી આગ લાગ્યા બાદ જોરદાર બ્લાસ્ટ થતા સ્થાનિક રહીશોમાં ગભરાટ ફેલાયો હતો. જેમાં વૃદ્ધ દંપતી બાલ-બાલ બચી ગયા હતા. જયારે  એક પાડોશી સામાન્ય દાઝી ગયો હતો. ફાયર વિભાગના સૂત્રો પાસેથી મળેલી વિગત મુજબ, ગોડાદરાના સુપર સિનેમા પાસે પ્રિયંકા ટાઉન એપાર્ટમેન્ટના ત્રીજા માળે ફ્લેટમાં વૃદ્ધ દંપતિ રહે છે. જેમાં ગતરોજ સવારે તેમના ફ્લેટમાં ગેસ લીકેજ થવાના કારણે આગ ભભુકી ઉઠી હતી જેના લીધે સિલિન્ડર બ્લાસ્ટ થયો હતો.જયારે આ પ્રચંડ બ્લાસ્ટ થવાનો અવાજ સાંભળી આજુબાજુના રહીશો ગભરાઈ ગયા હતા અને પોતાના ફ્લેટમાંથી બહાર નીકળી જીવ બચાવવા ભાગદોડ કરવા લાગ્યા હતા. વૃદ્ધ દંપતી સમસયર બહાર નીકળી જતા બચી ગયા હતા. જ્યારે તેમના પાડોશી સામાન્ય દાઝી જતા તરત નજીકની ખાનગી હોસ્પિટલમાં લઇ જવાયા હતા. બનાવ અંગે ફાયરબ્રિગેડને જાણ કરતા ફાયરબ્રિગેડનો કાફલો સ્થળ પર પહોંચી પોણો કલાકમા આગ પર કાબૂ મેળવી લીધી હતી. વધુમાં ફ્લેટમાં ફ્રીજ, ખુરશીઓ, પંખા, ગાદલા સહીત ઘર વખરીના સામાનને નુકસાન થયુ હોવાનું ફાયર સુત્રોએ જણાવ્યુ હતુ.