સુરતના કતારગામ પારસ સોસાયટી રાધે રેસીડેન્સીમાં રહેતા ભાયાભાઈ માધાભાઈ વોરા (ઉ.વ.72) જે નિવૃત્ત જીવન વ્યતિત કરતા હતા અને તેઓ તેમના સંબંધીના પુત્રને અકસ્માતમાં ફ્રેક્ચર થયું હોવાથી તેના ખબર અંતર પુછવા માટે ગતરોજ સવારે ગયા હતા. ત્યાંથી તેઓ ઘરે પોતાની બાઈક પર પરત ફરતા હતા. તે સમયે કતારગામ જે.કે.પી. નગરના ગેટની સામેથી પસાર થતા હતા. ત્યારે નશામાં ધુત થઈ પુરઝડપે સૂમલના દુધનો ટેમ્પો હંકારતા ટેમ્પો ડ્રાઈવરે તેમને અડફેટમાં લઈ લીધા હતા અને તેમને કચડી નાંખ્યા હતા. અકસ્માત બાદ ટેમ્પો ડ્રાઈવર સંદીપ અશોકભાઈ કોળીને ઝડપી પાડ્યો હતો અને પોલીસના હવાલે કર્યો હતો. નશામાં ધુત હોવાથી તે સીધો ઉભો પણ રહી શકતો ન હતો. જેથી પોલીસે તેની સામે ગુનો નોંધી તેની ધરપકડ કરી હતી અને કાયદેસરની કાર્યવાહી હાથ ધરી હતી.