સુરતના ભટાર શાકભાજી માર્કેટની પાછળ આવેલા હરિઓમ પાર્ક એપાર્ટમેન્ટમાં ગતરોજ પોલીસે રેઈડ પાડી જુગાર રમતા 7 વેપારીઓને ઝડપી પાડી તેમની પાસેથી રોકડ રકમ અને મોબાઈલ મળી કુલ રૂપિયા 74 હજારનો મુદ્દામાલ કબ્જે કરી કાર્યવાહી હાથ ધરી હતી.

ખટોદરા પોલીસના જણાવ્યા મુજબ, સર્વસન્સના માણસો પેટ્રોલીંગમાં હતા તે વખતે મળેલી બાતમીના આધારે ગતરોજ ભટાર શાકભાજી માર્કેટની પાછળ હરિઓમ પાર્ક એપાર્ટમેન્ટમાં રહેતા સુરેશકુમાર અમ્રુતલાલ પટેલના ફલેટમાં રેઈડ પાડી હતી. જેમાં સુરેશ પટેલ ઉપરાંત ભદ્રેશ મહેન્દ્ર પટેલ, રાકેશ મણીલાલ પટેલ, મયુર બાબુ પટેલ, સંજય મણીલાલ પટેલ, હિતેશ મહેન્દ્ર પટેલઅને હિતેન્દ્ર ત્રિભોવન પટેલના ઓને જુગાર રમતા ઝડપી પાડ્યા હતા. વેપાર ધંધા સાથે સંકળાયેલા જુગારીઓ પાસેથી પોલીસે દાવ ઉપરના રૂપિયા 20,420/- તેમજ અંગઝડતીના 12,620/- અને 7 મોબાઈલ મળી કુલ રૂપિયા 74,040/-નો મુદ્દામાલ કબ્જે કર્યો હતો. વધુમાં સુરેશ પટેલ પોતાના આર્થિક લાભ માટે  ભાડાના ફ્લેટમાં બહારથી લોકોને જુગાર રમાડવા માટે બોલાવી નાળ પેટે રૂપિયા ઉઘરાવતો હતો. આમ, પોલીસે તમામ વિરુદ્ધ ગુનો નોંધી કાયદેસરની કાર્યવાહી હાથ ધરી હતી.