ઓલપાડ તાલુકાના સાયણ ગામે સાયણ સુગર રોડ પર આવેલી નહેર કોલોની ખાતે રહેતો રાકેશ વિનોદભાઈ વસાવા (ઉ.વ 21) જેમને ગત તા.13ના રોજ તેમનો જન્મદિવસ હોય તે દિવસે તેમને યામાહા કંપનીની આર-15 સ્પોર્ટ બાઇક લીધી હતી અને જેનો હજુ રજીસ્ટર નંબર પણ બાકી હતો. જોકે ગત તા.24ના રોજ બપોરે 3 વાગ્યાના અરસામાં રાકેશ તેનો મિત્ર કાર્તિક સુંદર વસાવાને પાછળ બેસાડી ઓલપાડથી સાયણ તરફ આવી રહ્યા હતા.

તે સમયે સોસક કોટન મંડળી આગળના રોડ પાસેથી પસાર થતી વખતે તેમની આગળથી જતી એક્ટિવા મોપેડ નંબર જીજે/05/એફએન/8511ને ઓવરટેક કરવા માટે પુરઝડપે અને ગફલતભરી રીતે બાઇક હંકારી એક્ટિવા સાથે અકસ્માત થયો હતો. જયારે આ અકસ્માતમાં સ્પોર્ટ બાઇક ચાલક રાકેશ વસાવા રોડ પર પટકાતા શરીરે ગંભીર ઇજાઓ થતા તેનું ઘટના સ્થળે મોત થયું હતું અને પાછળ બાઇક પર બેસેલા કાર્તિકને શરીરે ગંભીર ઇજાઓ થતા સારવાર માટે હોસ્પિટલમાં લઈ જતા સારવાર દરમિયાન મોત નીપજ્યું હતું.